E fundit!

12:49 Politikë

Tensione në Kuvend/ Opozita bllokon foltoren, ndërpritet seanca

Tensione janë regjistruar në seancë plenare, pasi deputetë...

SHBA në panik/ Mbi 250 mijë viktima nga koronavirusi

19 Nëntor 2020, 16:55, Kosova & Bota CNA

Numri i vdekjeve nga koronavirusi në Shtetet e Bashkuara kaloi shifrën 250 mijë, ndërsa numri i infeksioneve të reja vazhdon të rritet në pjesën më të madhe të vendit. Qyteti i Nju Jorkut vendosi t?i mbyllë shkollat duke filluar nga sot (e enjte), pasi të mërkurën shënoi ditën e shtatë radhazi me një normë infektimi mbi 3 për qind.

Nju Jorku i rihapi shkollat në fillim të tetorit, kur mesatarja 7 ditore e rasteve pozitive ishte nën 2 për qind. Qytete të tjera të mëdha, si Bostoni dhe Detroit, kanë marrë gjithashtu masa për të ndalur mësimdhënien fizikisht në shkolla.

Prej fillimit të pandemisë, në të gjithë vendin janë regjistruar më shumë se 11.5 milionë raste me koronavirus. Që prej javës së kaluar mesatarja e rasteve ditore ka qënë 160 mijë, ose sa trefishi i asaj të një muaj më parë. Sipas të dhënave, më shumë se 1,100 persona vdesin çdo ditë.

Punonjësit e kujdesit shëndetësor po përballen me një numër rekord pacientësh të shtruar në spitale.

Shumë shtete ka rifilluar vendosjen e kufizimeve për të ngadalësuar përhapjen e virusit.

Guvernatori i Minesotës Tim Walz njoftoi të mërkurën mbylljen për katër javë të restoranteve, bareve dhe palestrave. Në Minesota infeksionet po shtohen me katër herë më shumë çdo ditë, krahasuar me mesin e tetorit.

Zyrtarët kanë shprehur shqetësim me afrimin e festës së Falënderimeve, periudhë kur miliona amerikanë mblidhen me anëtarët e familjes dhe shpesh udhëtojnë në pjesë të tjera të vendit.

Guvernatori i Virxhinias Ralph Northam u bëri thirrje banorëve të qëndrojnë në shtëpi, duke e cilësuar këtë “një akt dashurie”. Ai shtoi se nëse njerëzit vendosin të festojnë me të tjerë, duhet ta bëjnë këtë në grupe të vogla dhe jashtë.

Sekretari amerikan i Shëndetësisë dhe Shërbimeve Njerëzore Alex Azar bëri gjithashtu thirrje për kujdes gjatë një konference për shtyp të mërkurën.

“Grumbullimi në ambiente të mbyllura me njerëz që nuk janë anëtarë të familjes tuaj përbën rrezik të lartë për përhapjen e virusit“, tha ai.

Ndërkohë dy kompani farmaceutike kanë njoftuar lajme optimiste këtë javë. Rezultatet paraprake tregojnë se vaksinat e tyre kundër COVID-19 kanë qenë efektive. Zoti Azar tha se këto zhvillime tregojnë se brenda disa javësh Administrata e Ushqimit dhe Barnave (FDA) mund të autorizojë vaksinat dhe ato mund të jenë gati për shpërndarje.

“Për shkak të punës së kryer, deri në fund të dhjetorit ne presim që të kemi rreth 40 milionë doza të këtyre dy vaksinave, të disponueshme për shpërndarje, ndërsa pritet të merret autorizimi nga FDA. Këto do të jenë të mjaftueshme për të vaksinuar rreth 20 milionë amerikanë që u takojnë grupeve më të ekspozuara ndaj rrezikut. Prodhimi do të vazhdojë të rritet pas kësaj?, tha zoti Azar.

Qeveria amerikane ka miratuar një program të prodhimit të vaksinave që synon shpërndarjen e tyre falas./ VOA