E fundit!

12:20 Aktualitet

35 vjetori i PS-së/ Berisha: Mitingu i djeshëm shënoi fundin e partisë së krimit

Kreu i PD-së Sali Berisha në një bashkëbisedim me ndjekësi...

Rama-Meta-Basha nuk kanë nevojë për këshillin politik

17 Korrik 2020, 14:47, Politikë CNA

Dje pasdite Basha shkoi me urgjencë në zyrën e Metes dhe përpara kamerave “njoftoi” presidentin që maxhoranca kish votuar në këshillin e legjislacionit ndryshime kushtetuese që hapnin listat dhe hiqnin mundësinë e abuzimit me koalicionet parazgjedhore.

Meta mori dijeni nga Basha për sa po ndodhte në Kuvend prej gati 2 javësh sepse me sa duket e kishte pasur të pamundur të informohej për këtë nga mediat që kontrollon.

Basha nga ana e vet nuk ja sqaronte dot në telefon të gjitha dhe nuk e bënte dot as nëpërmjet mediave që kontrollon ky i fundit, pasi kish marrë vesh që Meta kish ditë që nuk lexonte asgjë nga shtypi i përditshëm.

Sot në mëngjes zgjimin na e bëri Meta, po jo sepse u shqetësua dje pasdite nga sa i tha Luli.

Metën e kishte kthjelluar mesazhi i Kristaq Kumes që i thosh se çështja që po diskutohet prej dy javësh në kuvend e për të cilën po ndizen mediat, qenka çështje që duhet të trajtohet në këshillin politik meqë aty u zbardh marrëveshja e 5 qershorit.

Nuk arriti të ngrysej dhe doli Rama që u shpreh dakord për takimin e këshillit politik dhe që ai na qenkësh i gatshëm bilé që të vejë vetë dhe mos çojë Damianin të vetëm në këshillin politik.

Të paktën Rama nuk sajoi ndonjë mesazh të dikujt në celular që të bënte sikur sapo mori dijeni për të rejat nga zyra e Presidentit.

Rama na e kurseu gallatën dhe tregoi thjesht që po rrinte gati në pritje që Meta të shkruante në media “propozimin e Kumes”.

Tani duhet t?i marrim pak me radhë çështjet!

Rama është pro listave të hapura dhe heqjes se mundësive për abuzim me koalicionet parazgjedhore.

Luli Basha është i shqetësuar për atë për të cilën është pro Rama, se ndryshe nuk justifikohet që shkoi bezdisi Presidentin pasditen e të enjtes. Kjo na bën të besojmë që Basha është kundër hapjes së listave dhe heqjes së mundësive për abuzim me koalicionet parazgjedhore por nuk e thotë.

Meta ka dëgjuar Bashën dhe duket edhe ai është i shqetësuar për atë për të cilën është pro Rama. Kjo na bën të besojmë që edhe Meta si Basha, është kundër hapjes së listave dhe heqjes së mundësive për abuzim me koalicionet parazgjedhore, por as ai nuk e thotë.

Nuk e kuptojmë pse u duhet Këshilli Politik Bashës dhe Metës?

Apo atje besojnë se nuk do kenë turp të thonë që janë kundra?

Në çdo rast, nëse po i shkelin syrin njëri-tjetrit për t’u takuar, s’kanë nevojë që takimit t?i vënë emërtim “këshill politik”.

Nuk u duhet këshilli politik për të formalizuar hallet që kanë.

Mundet të ishin takuar të tre që dje pasdite.

Dhe të na kishin kursyer të paktën leximin e mesazheve të mesnatës që Kumja i niska Presidentit. /CNA.al