U arrestua në klasën e gjashtë, u tradhëtua dhe u vra/ Kush ishte Qemal Stafa

12 Nëntor 2019, 07:54, Aktualitet CNA

Qemal Stafa lindi në Elbasan, më 12 mars 1921, nga një familje – siç thoshte vetë ai në një punim frëngjisht – «gjysëm borgjeze». I ati, oficer me formim liberal, i zhveshur nga paragjykimet fetare të kohës, transferohet më 1923 në Shkodër dhe vendoset aty me gjithë familjen.

Duke dashur t?i japë të birit një kulturë të gjerë perëndimore, e dërgon të mësojë pranë Etërve Jezuitë, ndër të cilët mund të përmendim dom Ndre Mjedën. Më 1934, kalon në gjimnazin shtetëror.
Bashkë me studentë të tjerë, themelon shoqërinë «Besa Shqipëtare» dhe përpiqet të nxjerrë një revistë të përmuajshme, duke hartuar dhe një kryeartikull me titullin «Qëllimi i Ynë», si dhe një skicë; por revista nuk e pa dritën e botimit. Revista u ndalua prej Ministrisë së Arsimit dhe studentët ranë nën vëmendjen e autoriteteve dhe xhandërmarisë.

Më 27 korrik 1935 i vdes i ati dhe më 1936 vendoset me gjithë familjen në Tiranë. Në shkurt të vitit 1937 digjen regjistrat e Liceut të Shtetit dhe Qemal Stafa arrestohet bashkë me disa studentë të tjerë. Ishte në klasë të gjashtë. Megjithatë, sabotatori do zbulohet dhe ai bashkë me shokët do të lirohet pas pak kohe. Do të arrestohet sërish në gusht të po atij viti dhe do dërgohet në Elbasan, për t?u gjykuar në procesin që kish nisur atje për disa shokë të tij. Megjithatë, do dalë i pafajshëm nga ky proces dhe do kthehet në Tiranë. Këtu do punojë disa kohë pranë shtypshkronjës «Luarasi», por do ta humbasë punën për shkak të veprimtarive antizogiste.

Në gusht të vitit 1938 shkon bashkë me të vëllain më të madh, i cili ishte sëmurë, në qytetin Golnik të Jugosllavisë.
Një muaj më vonë, do kthehet në Shqipëri dhe më 1938 do shkojë në Paris, duke u njohur me mërgatën shqiptare të atjeshme. Në janar 1939 kthehet në Itali për t?u regjistruar në Fakultetin e Drejtësisë, në Universitetin e Firences. Prej këtej, niset për në atdhe. Me të shkelur në Shqipëri, arrestohet ditët e para të janarit dhe në procesin e vitit 1939, është një prej protagonistëve. Akuzohet si komunist, armik i regjimit dhe se kur ndodhej në Francë, ishte takuar me të arratisurit politikë antizogistë. Dënohet me 15 vjet burg, po përfiton nga mosha dhe dënimi i ulet në 7 .

Bashkë me disa shokë internohet në Mbreshtan të Beratit; prej këtej, me ndërhyrjen e disa miqve, transferohet në burgun e Tiranës, që të marrë pjesë në varrimin e të vëllait të madh, që ndërkohë kish vdekur.
Me ngjarjet e ditëve të para të 7 prillit, Qemal Stafa del bashkë me shokët e tjerë nga burgu dhe shkon në Itali, për të vazhduar studimet. Qëndron atje për gjashtë muaj i internuar dhe me vështirësi të mëdha kthehet përsëri në atdhe, ku zë punë pranë firmës «Vëllezërit Kaceli». Do vazhdojë të udhëtojë në Itali, ku do miqësohet me prof. Calamandrei, një antifashist. Njihet me prof. Calasso, i cili u vra nga gjermanët në mbarim të luftës, në Italinë e Veriut.

Më 27 dhjetor 1940, m.q.s. refuzon bashkë me disa shokë të tjerë të shkojë në Romë me grupin e studentëve shqiptarë të Firences, për inaugurimin e monumentit të Skënderbeut, arrestohet nga policia italiane dhe mbahet për disa ditë në burg. Pasi lirohet, kthehet në Shqipëri më 15-16 qershor 1941 dhe hidhet në ilegalitet.

Është koha kur Partia Komuniste dhe strukturat e saj rinore kanë nisur të organizohen dhe Qemal Stafa ngarkohet me përgjegjësinë e Sekretarit Politik të Komitetit Qëndror të Partisë Komuniste Shqipëtare. Vritet tradhtisht më 5 maj 1942, në një rrugë të Tiranës./ Edion Petriti-(Marrë nga: QEMAL STAFA, botime të gazetës Bashkimi, shtypshkronja ?Dielli?, Tiranë, 1945).