E fundit!

09:06 Kronika

Të shtënat me armë në Shkodër/ Arrestohen 2 persona

Specialistët për Hetimin e Krimeve të Komisariatit të Poli...

Kandidon për të zënë vendin e Dakos/ Sako mesazh Bashës dhe Kryemadhit

1 Qershor 2019, 10:40, Aktualitet CNA

Valbona Sako (Bishaj) është kandidatja e parë grua nga Partia Socialiste për Bashkinë e Durrësit.

Sako, e cila synon të udhëheq Bashkinë e Durrësit, vjen pas një përvoje 25 vjeçare në fushën e financave.

Në një intervistë për CNA.al, Sako ka thënë se emri i saj për Bashkinë e Durrësit u përzgjodh pas një faze të gjatë shqyrtimi kandidaturash nga radhët e PS.

E pyetur se çfarë do të bëjë ndryshe nga Vangjush Dako në krye të Bashkisë së Durrësit, Sako nuk ka preferuar të përgjigjet në mënyrë të drejtpërdrejtë.

“Në të ardhmen, sigurisht që do vazhdoj punët e mira dhe transformuese që janë bërë si dhe njëkohësisht do trajtoj për zgjidhje të reja, sfidat e reja që koha do paraqes në këtë drejtim”, ka thënë ajo.

Ndër të tjera, Sako ka ftuar drejtuesit Opozitës, Lulzim Basha dhe Monika Kryemadhi që të punojnë dhe të artikulojnë, bazuar në interesat madhore të Shqipërisë, jo në të kundërt.

Kryebashkiaku Vangjush Dako, është shigjetuar ashpër nga Opozita, pasi emri i tij doli në një përgjim. Vetë Dako është se s’ka bërë asgjë të kundërligjshme, veçse i ka hapur telefonin çdo qytetari, për çdo lloj problemi.

CNA.al pyeti zonjën Sako, nëse do të komunikonte me qytetarët njësoj si Dako, nëpërmjet telefonit apo s do ta bënte këtë “gabim”.

“Filozofia ime do jetë ajo e përpjekjes maksimale për të takuar cdo banor të Durrësit dhe çdo familje. Transparenca dhe komunikimi i shpejtë e efikas do sigurohen nëpërmjet ristruktimit të zyrave përkatëse të Bashkisë, që do orientojnë çdo problem të çdo qytetari, gjë të cilën e kam nisur që në fillim të shpalljes së candidatures, duke u ofruar mundësi komunikimi banorëve të Durrësit nëpërmjet e-mailit tim dhe rrjeteve të mia sociale”, është shprehuar Valbona Sako.

Intervista e plotë:

Pse vendosët të garonit në zgjedhjet vendore?

Partia Socialiste, pas një faze të gjatë shqyrtimi kandidaturash të mundshme, më propozoi mua. Për mua kjo është një sfidë dhe përgjegjësi që e pranova me kënaqësi.

Ishte një propozim i shpejtë, apo ishte një propozim i mirëmenduar?

Një kandidaturë e mirëmenduar.

Ju jeni kandidatja e parë grua nga radhët e PS për Bashkinë e Durrësit. Çfarë do të bëni më shumë dhe ndryshe ngaVangjush Dako për qytetarët e Durrësit?

Në të ardhmen, sigurisht që do vazhdoj punët e mira dhe transformuese që janë bërë si dhe njëkohësisht do trajtoj për zgjidhje të reja, sfidat e reja që koha do paraqes në këtë drejtim

Cila është platforma juaj?

Platforma ime përmban kryesisht këto drejtime:

a) fuqizimin e të rinjve dhe grave, nëpërmjet shtimit të shërbimeve dhe aksesueshmërisë.

b) vëmendje e shtuar në çdo drejtim, ndaj zonave periferike dhe rurale

Të gjitha çfarë u përmendën dhe më sipër, do vihen dhe në funksion të zhvillimit të projekteve të rëndësishme për turizmin.

Zgjedhjet e 30 Qershorit, vijnë në një klimë krize. A ju pengon kjo situatë juve, për të garuar normalisht.

Unë jam kandidate për Bashkinë e Durrësit, në një proces të konfirmuar tashmë.

Si e konsideroni faktin që përballë jush keni vetëm një kandidate, atë të Bindjes Demokratike. Si e shihni këtë garë, si e ndjeni veten?

Besoj, që ne si dy zonja konkurente për Bashkinë e Durrësit, do dimë të përcjellim përgjatë fushatës alternativa domethënëse si dhe vlerat e duhura njerëzore..

A do të donit të përballeshit me më shumë kandidatë dhe me kë do të donit të kishit garuar ?

Jemi në një garë ku kandidatët janë përcaktuar.

Opozita joparlamentare nën drejtimin e Lulzim Bashës dhe Monika Kryemadhit, kërcënon me prishje të zgjedhjeve. A keni një përgjigje për ta?

I ftoj të punojnë dhe të artikulojnë, bazuar në interesat madhore të Shqipërisë, jo në të kundërt.

Si keni vendosur t’i mbroni votat që do të merrni?

Votat nuk i mbroj unë, por institucionet që sigurojnë dhe certifikojnë procesin e votimeve. Mbi të gjitha Durrësi ka përfaqësuar gjithmonë vlerat demokratike dhe qytetare.

Emri i Vangjush Dakos, u lakua në përgjime. Vetë Dako tha, se ai fliste në telefon me çdo qytetar që kërkonte. Ju do t’ua hapni qytetarëve telefonin si Dako, apo nuk do të bëni “gabimin” e tij?

Filozofia ime do jetë ajo e përpjekjes maksimale për të takuar cdo banor të Durrësit dhe çdo familje. Transparenca dhe komunikimi i shpejtë e efikas do sigurohen nëpërmjet ristruktimit të zyrave përkatëse të Bashkisë, që do orientojnë çdo problem të çdo qytetari, gjë të cilën e kam nisur që në fillim të shpalljes së candidatures, duke u ofruar mundësi komunikimi banorëve të Durrësit nëpërmjet e-mailit tim dhe rrjeteve të mia sociale./CNA.al