LEXO PA REKLAMA!

SHKARKO APP

Certifikimi i dokumenteve në Itali/ Ministria e Jashtme jep njoftimin e rëndësishëm

5 Dhjetor 2018, 12:35, Aktualitet CNA

Ministria për Evropën dhe Politikat e Jashtme, në kuadër të lehtësimit të shëtbimeve konsullore, njofton të gjithë shtetasit shqiptarë që ndjekin procedurat e legalizimit të dokumenteve për përdorim në Itali, se në bashkëpunim të ngushtë me autoritetet italiane, është vendosur të hiqet certifikimi i përkthimit të dokumentit nga ana e Ambasadës Italiane duke filluar nga data 1 janar 2019.

Kjo procedurë hyn në fuqi më 1 janar 2019 dhe përbën lehtësim për shtetasit, duke konsistuar si në shkurtimin e afateve kohore, ashtu edhe të kostove financiare, duke marrë parasysh se ky proces, pra edhe certifikimi i përkthimit të dokumentit, tashmë do të përmbyllet pranë Sektorit të Legalizimit në MEPJ.

Duke filluar nga 1 janar 2019, Sektori i Legalizimeve, në kuadër të këtij dakordësimi, do të legalizojë dokumentin origjinal si dhe përkthimin e tij.

Deri tani qytetarëve shqiptarë u është kërkuar që pasi të apostilonin pranë Ministrisë për Evropën dhe Punët e Jashtme dokumentin për përdorim në Itali, ta përkthenin atë në një noter dhe më pas ta legalizonin pranë Ambasadës italiane para se ky dokument të bëhej i përdorshëm në Itali. Me marrëveshjen e re, pas përkthimit të dokumentit tek një noter, certifikimi i përkthimit nuk do të bëhet më nëpërmjet Ambasadës italiane por nëpërmjet Ministrisë për Evropën dhe Punët e Jashtme.

Në njoftimin e ministrisë bëhet me dije se me këtë procedurë shkurtohet koha dhe kostoja e certifikimit dhe përkthimit ët dokumenteve.

?Me këtë procedurë, jo vetëm që shkurtohet koha e marrjes së shërbimit nga 20 ditë në 7 ditë, por edhe tarifa, e cila nga rreth 5.000 lekë shkon në rreth 2.200 lekë. Gjatë një viti legalizohen rreth 120.000 dokumente shqiptare për përdorim në Itali, që do të thotë se me procedurën e re, qytetarët shqiptarë do mund të kursejnë rreth 335.280.000 lekë ose rreth 2.6 milion euro.

Ministria për Evropën dhe Punët e Jashtme, falënderon Ministrinë e Punëve të Jashtme të Italisë dhe në veçanti Ambasadën italiane në Tiranë për bashkëpunimin dhe vullnetin e mirë për të lehtësuar sa më shumë procedurat për shtetasit shqiptarë.?- shkruhet në njoftim./CNA.al

Lajmet e fundit nga