Gjyqtarët dhe prokurorët e korruptuar nën hetim/ Zbardhet skema se si ranë në grackë

1 Mars 2018, 09:24, Aktualitet CNA

Ndërkombëtarët dhe mazhoranca duket se kanë futur në kurth të gjithë gjyqtarët dhe prokurorët.

Kur u hartua ligji i vetingut, u deklarua disa herë se qëllimi i tij është të largojë të paaftët nga sistemi dhe nuk ka si synim ndjekjen penale. Madje në ligj janë futur dhe disa elementë, ku gjyqtarët që largohen përfitojnë pension, po ashtu kanë mundësi trajnimi dhe shumë favore të tjera.

Por duket se e gjithë kjo ka qenë kurth për njerëzit e drejtësisë, pasi shumë nga ata që nuk e kalojnë vetingun do të duhet të përballen me drejtësinë.

Kreu i Komisionit të Ligjeve dhe një prej hartuesve të reformës në drejtësi, Ulsi Manja, duke folur dje në një konferencë mbi reformën në drejtësi, tha se nëse në veting është zbuluar se gjyqtarët kanë fshehur para apo kanë pastruar para, atëherë do ketë ndjekje penale.

Kështu, pika e vetme që mund të dërgojë pas hekurave gjyqtarët apo dhe prokurorët është pasuria.

Sa i takon pastërtisë së figurës, kontaktet që mund të kenë pasur ata me botën e krimit nuk i çojën për ndjekje penale nëse nuk ka prova për vepra kriminale. Po ashtu edhe nëse rezultojnë se ka pasur shkelje me vendimet, po ashtu nuk mund të ketë ndjekje penale.

I vetmi rast është pasuria. Të dhënat që ka dorëzuar ILDKP janë tepër të sakta dhe nëse një emër ka bërë deklarim të rremë, apo ka fshehur të ardhurat atëherë kjo është vepër penale e parashikuar në ligj, raporton gazeta Sot.

Kjo do të thotë se kushdo që ka vënë pasuri të dyshimtë dhe ka pastruar para brenda e jashtë vendit, jo vetëm do të ikë nga sistemi gjyqësor por do të përballet me akuza penale.

Për të vërtetuar pasuritë korruptive, mësohet se Komisioni i Pavarur i Kualifikimit ka vënë në lëvizje pjesën më të madhe të autoriteteve shtetërore. Sipas burimeve u janë dërguar letërporosi disa institucioneve, përfshirë Hipotekën, Tatimet dhe disa bankave.

Nga të dhënat që do të merren nga këto institucione do të shihet nëse ka pasur apo jo abuzime me deklarimin e pasurisë. Por sapo vetingu të japë rezultatet e para, duket se do ketë dhe kallëzime penale.