Nga Kastriot Myftaraj/Absurdi i emërtimit “Muzeumi i Artit Mesjetar” në Korçë

6 Tetor 2016, 20:53, Aktualitet CNA

Meqënëse shteti komunist shqiptar ishte zyrtarisht ateist, kur në 1980 u bë në Korçë një muzeum që do të ekspozonte ikonografinë shqiptare, ky nuk u quajt Muzeumi Ikonografik siç do të kishte merituar të quhej, por Muzeumi i Artit Mesjetar. Një emërtim që u diskutua atëherë ishte Muzeumi i Artit Bizantin, që gjithsesi nuk do të kishte qenë i saktë. Sepse ky muzeum nuk përmbante ndonjë gjë tjetër të artit bizantin përveç ikonografisë.

Emërtimi ishte i pasaktë edhe nga pikëpamja shkencore historiografike. Sepse një pjesë e madhe e ikonave të muzeumit iu përkisnin shekujve XVII, XVIII, madje kishte edhe të shekullit XIX. Sipas historiografisë zyrtare shqiptare të kohës, Mesjeta mbaronte me fundin e shekullit XV. Në këtë periudhë përfundonte edhe Mesjeta Europiane. Them se ndarja e epokave historike është e drejtë megjithëse Shqipëria hyri në periudhën e gjatë të pushtimit otoman, sepse Mesjeta ishte një kategori historike europiane jo aziatike, prandaj fakti që përfundimi i saj në fund të shekullit XV koincidon me pushtimin otoman të Shqipërisë, nuk do të thotë se për Shqipërinë vazhdoi Mesjeta, një periodizim historic europian.

Në 2016, nga Muzeumi i vitit 1980, u krijua një muzeum i ri, për të cilin u përzgjodhën 600 nga mijëra eksponatet e muzeumit të vjetër, ikona dhe ikonostazë, në fakt ato më të çmuarat. Ideja është e mirë sepse kështu, veçanërisht vizitorët e huaj, me kureshtjen e të cilëve nuk duhet abuzuar, mund të shohin koleksionin e përzgjedhur të ikonografisë sonë. Ideja është e mirë. Kryeministri Rama, duke mbajtur fjalimin promovues në hapjen e këtij muzeumi të ri, deshi të marrë meritën për këtë vepër Sidoqoftë, ideja është shumë e mirë.

Por përse duhet që shteti shqiptar i vitit 2016 të sillet si shteti komunist i vitit 1980 duke ruajtur për muzeumin e vjetër dhe të riun, emërtimin e dikurshëm absurd. Vizitorët e huaj që shikojnë ikona të shekujve XVVII, XVIII dhe XIX në këtë muzeum nuk mund të mos bëhen kureshtarë dhe të pyesin se a nuk e dikan shqiptarët që Mesjeta përfundoi me shekullin XV!

Muzeumit duhet t? i jepet emërtimi i duhur që është Muzeumi Ikonografik. Unë, që kam lindur dhe jam rritur në qytetin e Korçës, mbaj mend se kur u hap muzeumi në 1980, korçarët e quajtën atë Muzeumi i Ikonave. Ky emërtim popullor ishte më i saktë se ai zyrtar. Shkruar për Citynews