Drejtësia/ Rama: Reforma do kalojë me konsensus, vijat e kuqe nuk shkelen

20 Korrik 2016, 13:27, Aktualitet CNA

Kryeministri Edi Rama, është shprehur sot se reforma në drejtësi do të kalojë me konsensusin e të gjitha palëve politike në parlament.

Përmes një konference për shtyp nga kryeministria, Rama tha se ky është një moment lehtësimi për të gjithë shqiptarët.

?Është një moment lehtësimi për të gjithë shqiptarët, për qytetarët dhe qytetaret e këtij vendi, të cilët tanimë e kanë marrë lajmin se PD i është nënshtruar vullnetit të hekurt të popullit shqiptar dhe vullnetit të hekurt të ndërkombëtarëve që bashkë me shqiptarët të çojnë përpara një reformë historike që i hap rrugë revolucionit në sistemin e drejtësisë, për përmbysjen e kastës së korruptuarve që mban peng drejtësinë.?, tha Rama

Kryeministri lexoi edhe mesazhin e komisionerit Hahn, i cili i kishte propozuar 3 krerëve të partive kryesore konsensusin mbi rekomandimin e fundit të ndërkombëtarëve.

?Është kënaqësi të ndaj me gjithë ju tekstin e mesazhit që unë, kryetari i Kuvendit dhe kryetari i opozitës, kemi marrë nga komisioneri Hahn.

I dashur kryeministër, i dashur spiker, i dashur kyetar i PD

Në vijim të bisedave me të tre ju, do të doja të përsërisja pikat e mëposhtme të të quajtur propozim hibrid që i keni në tavolinë.

Këto pika janë vijat e kuqe për ndërkombëtarët.

E para: Roli i ONM duhet të ketë një bazë solide të ligjshme brenda Kushtetutes së Shqipërisë

E dyta: E rinënvizoj soc kemi thënë se ONM do të bëjë rekomandime që nuk janë ligjërisht të detyrueshme dhe do të mbajnë arsyetimin mbi qëndrimin e marrë.

Unë besoj se ne mund të vijojmë tani mbi këtë bazë. Ju lutem konfirmoni përmes një përgjigje në mënyrë që votimi të bëhet.”, citoi Rama mesazhin e Hahn

Lidhur me këtë mesazh dhe mbi dakordësinë e arritur mes palëve, Rama tha se vijat e kuqe mbeten të palëvizura pasi garantojnë vijën mbrojtëse nga përpjekjet për të kapur drejtësinë. Ai u shpreh i gëzuar që PD u bë pjesë e kësaj fitoreje të madhe për Shqipërinë.

?Kjo do të thotë se vijat e kuqe do të mbeten të palëvizura, që do të thotë se falë këtyre vijave të kuqe, kjo reformë ka garantuar vijën mbrojtëse nga përpjekjet për të penguar reformën në drejtësi.

Jam shumë i gëzuar që PD u bë pjesë e kësaj fitoreje të madhe për Shqipërinë dhe shqiptarët. Jam i gëzuar se përpjekja për ti shpallur luftë SHBA dhe BE rezultoi një flluskë sapuni.? tha Rama