Shënim/ Politika e Shullazit

18 Prill 2016, 08:19, Aktualitet CNA

Arrestimi i një personi me preçedentë penalë i njohur nga opinioni publik si njeri i botës së krimit, ka përplasur palët politike në një debat, i kujt është dhe kujt i ka shërbyer. Në fakt ngjarjet dhe faktet akuzojnë të dyja palët politike. Por, Emiljano Shullazi është prangosur pas denoncimeve të vazhdueshme të Sali Berishës dhe ?lojës? së prokurorisë me policinë.

Gazetari, Artan Hoxha, gjatë një komenti të tij pas arrestimit të Shullazit, tha se gjatë kohës së PD, ai ishte arrestuar tre herë dhe po tre herë ishte liruar.

Ndërkohë prej dy vitesh emri i tij është ?hit? në parlament. Opozita ka akuzuar direkt Ministrin e Brendshëm Saimir Tahiri, dhe më pas Kryeministrin Edi Rama, për lidhje me Shullazin.

Fatkeqësisht në të dyja kohët i njëjti person me precedentë penalë është përdorur nga të dyja palët politike. Këtë e vërtetojnë vetë akuzat e palëvce në dy kohë.

Janë 3 raste ndalimi gjatë kohës së qeverisjes së PD dhe në asnjë rast nuk është mundur të faktoheshin krimet. Pas disa muajsh Emiljano Shjullazi lirohej dhe vazhdonte aktivitetin e tij.

Denoncimet e Partisë Demokratike, pas daljes në opozitë, kanë qenë të vazhdueshme ashtu siç kanë qenë denoncimet e socialistëve gjatë qeverisjes së Berishës. Kujtojmë zgjedhjet lokale në vitin 2011, kur Vasilika Hysi dhe Besnik Bare denoncuan publikisht kërcënimin e tyre nga Emiljano Shullazi pranë një qendre votimi në minibashkinë nr. 7.

Të dyja palët e kanë denoncuar këtë personazh se i ka dëmtuar politikisht në kohë të ndryshme. Kujtojmë denoncimin e bërë nga Partia Demokratike pak kohë më parë, ish deputetja Voltana Ademi, sot në kryetare e bashkisë Shkodër, deklaroi se ishte kërcënuar nga Shullazi në një nga lokalet e kryeqytetit me një mesazh, i cili në fakt i drejtohej Lulzim Bashës, që të mos përmende emrin e Shullazit në konferenca për shtyp.

Rastet tregojnë qartazi se segmentet apo drejtues të niveleve të larta politike kanë pasur lidhje me njerëz të botës së krimit. Rasti Shullazi mund të jetë një nga njëmijë të tilla, por është më publiku dhe më mediatiku.

Fatkeqësisht politika është e zhytur në krim dhe nuk mjafton dekriminalizimi i parlamentit. Duhet dekriminalizimi i klasës politike, shkëputja e saj prej lidhjeve dhe pazareve me krimin që të mos kemi akuza nga palët në lidhje me këdo kriminel apo grup kriminal.

Politika shqiptare ka nevojë për një pastrim rrënjësor, jo thjesht me ligje për të hequr nga parlamenti persona me precedentë penalë që përdoren nga kryetarët e partie, apo deputetë dhe politikanë që më mirë ndjehen me cuba qytetesh se sa me qytetarë dhe intelektualë./citynews