Shtrenjtohen ushqimet dhe arsimi, më lirë karburantet dhe ilaçet

11 Shkurt 2016, 20:37, Ekonomi CNA

Shtrenjtohen arsimi dhe ushqimet, ndërkohë që karburantet ulin inflacionin. Matja e indeksit të çmimeve të konsumit u bë mbi bazën e shportës së re. Kështu, INSTAT i detyruar nga rënia e konsumit dhe evidenca e shpenzimeve për mallra dhe shërbime të reja, ndryshon përbërjen e shportës me të cilën matet inflacioni. Në janar 2016, ndryshimi vjetor i indeksit të çmimeve të konsumit është 1,5%. Një vit më parë, ky tregues ishte 1,3%. Rritja vjetore në janar është ndikuar kryesisht nga grupi ?Ushqime dhe pije joalkoolike? me +1,55 pikë përqindje. Çmimet e grupit ?Shërbimi arsimor? kanë kontribuar me +0,19 pikë përqindje. Çmimet e grupit ?Pije alkoolike dhe duhan? kanë kontribuar me +0,16 pikë përqindje. Në fund renditen çmimet e grupeve ?Hotele, kafene e restorante? dhe ?Argëtim e kulturë?, që kanë kontribuar me nga 0,03 pikë përqindje secili. Nga ana tjetër, çmimet e grupit ?Qira, ujë, lëndë djegëse dhe energji? kanë kontribut negativ prej -0,27 pikë përqindje. Edhe çmimet e grupit ?Transporti? ndikuan -0,16 pikë përqindje. Po ashtu, çmimet e grupit ?Veshje dhe këpucë? kanë dhënë efekt negativ -0,15 pikë përqindje. Ndërsa çmimet e grupit ?Shëndeti? kanë rënë duke kontribuar me -0,06. Në të njëjtën linjë, çmimet e grupit ?Komunikimi? kanë kontribuar me -0.03 pikë përqindje.

Çmimet

Krahasuar me muajin janar 2015, rritja më e madhe e çmimeve vërehet në grupin ?Shërbimi arsimor? me 4,8%. Kjo rritje ka lidhje me pagesat më të larta që paguajnë studentët në këtë periudhë në universitetet publike dhe shkollat e larta private. Më pas vjen grupi ?Ushqime dhe pije joalkoolike? me rritje 4,3%, grupi ?Pije alkoolike dhe duhan? me 3,3%, etj. Brenda grupit të ushqimeve, çmimet e nëngrupit ?fruta? u rritën me 24,7%, pasuar nga nëngrupi ?Zarzavate përfshirë patatet? me 19,3%, nëngrupi ?Sheqer, reçelna e ëmbëlsira? me 1,4%, nëngrupi ?Vajra dhe yndyra? me 0,8% etj. Çmimet e nëngrupit ?Qumësht, djathë e vezë? u ulën me 5,5%, pasuar nga nëngrupet ?Kafe, çaj e kakao? me nga 1,3%, ?mish? me 0,8% etj. Ndërsa, ulja më e madhe e çmimeve vërehet në grupin ?Veshje dhe këpucë? me -3,7%, pasuar nga grupet ?Transport? me -2,5%, ?Shëndeti? me -1,6%. Ndryshimi mujor i indeksit është 0,9%. Krahasuar me muajin dhjetor 2015, rritja më e madhe mujore e çmimeve vërehet në grupin ?Ushqime dhe pije alkoolike? me 2,5%. Ulja më e madhe mujore e çmimeve vërehet në grupin ?Transporti? me -3,3%. Krahasuar me muajin e mëparshëm, çmimet e eurodiezelit u ulën me 5,8% dhe çmimet e benzinës me 5,6%.

Shporta e re

Indeksi i Çmimeve të Konsumit nga muaji janar 2016 do të llogaritet dhe publikohet me shportën e re të mallrave dhe shërbimeve, njoftoi INSTAT. Peshat e mallrave dhe shërbimeve janë llogaritur bazuar në Anketën e Buxhetit të Familjeve 2014, që do të thotë se pesha e ushqimeve në shpenzimet familjare ulet dhe marrin rëndësi shërbime të tilla si arsimi, shëndetësia apo argëtimi. Indeksi i ri llogaritet duke konsideruar si periudhë bazë muajin dhjetor 2015. Ndryshimi i fundit i shportës së artikujve është bërë në janar të vitit 2007, ku numri total i artikujve u rrit nga 262 në vitin 2002, në 271 artikuj. Në shportën e re, numri total i artikujve është 333, njoftoi INSTAT./Shqip