E fundit!

08:01 Kosova & Bota

Çfarë është stresi ekstrem i nxehtësisë?/ Brenda fenomenit vdekjeprurës që po përhapet në të gjithë Evropën

Sipas një studimi të ri të madh, disa pjesë të Evropës po ...

Greqi/ Protestuesit bllokojnë akset kryesore të vendit me 6000 traktorë

21 Janar 2016, 21:23, Kosova & Bota CNA

Mbi 6000 traktorë janë nxjerrë pranë doganave dhe pikave nevralgjike të rrugëve nacionale nga fermerët grekë që kanë filluar protestën e tyre, ashtu siç kishin paralajmëruar pas dështimit të bisedimeve me ministrin grek të Bujqësisë në lidhje me reformën e re të pensioneve dhe sistemin e tatim-taksave.

Fermerët që janë gati të bllokojnë disa pika doganore në Greqinë e Veriut në kufirin me Maqedoninë dhe Bullgarinë, kanë mbyllur në mbrëmjen e së mërkurës për disa orë rrugën kryesore që lidh Athinën me Selanikun pranë Larisës dhe kanë ngritur blloqe me traktorët e tyre në autostraden Egnatia në Greqine Qendrore, në Peloponez , në Janinë dhe Arta e deri në kufijtë me Turqinë.

Duke kërkuar më shumë lehtësime për sistemin e taksave ata nuk pranojnë tashmë të negociojnë me ministrin e Bujqësisë, por duan të bisedojnë vetëm me kryeministrin grek, Aleksis Tsipras.

“Qeveria po planifikon masa shtrënguese për fermerët e vendit duke filluar nga reforma e pensioneve ku trefishon kontributin personal dhe më pas me sistemin e ri të taksave të cilat, duke u kombinuar, u marrin bujqërve 85% të të ardhurave të tyre”, tha një fermer.

Ndërkohë për të dytën herë brenda një jave kanë mbushur rrugët e Athinës avokatët grekë, mjekët, inxhinierët dhe nënpunësit e sektorëve shkencorë të vendit kundër reformave të qeverisë.

Duke dhënë një përgjigje ndaj mediave që e quajtën protestën e tyre të parë si “demonstrata e kostumeve dhe tajerëve”, ata kanë hequr kravatat e tyre dhe i kanë varur në disa prej pemëve pranë Parlamentit duke dashur të thonë se reformat e reja të qeverisë për taksat dhe pensionet do shkatërrojnë profesionet e tyre.

“Ne nuk po flasim për një reformë të logjikshme në një kuadër kur të gjithë kontribuojnë, por për një ligj që në kombinim me sistemin e ri të taksave, merr rreth 80 për qind të të ardhurave të të vetë punësuarve profesionistë. Duke pasur parasysh kohën e vështirë që ne po kalojmë dhe me këtë papunësi të madhe, ajo çfarë mbetet nuk është e mjaftueshme për të mbijetuar”, tha Panajota Mpourletidou, juriste.

Ndërkohë, qeveria greke beson se nuk duhet që të reduktojë përsëri pensionet të cilat janë shkurtuar prej vitit 2010 deri në masën 40%. Protestat që kanë më shumë se një javë që kanë filluar do të vazhdojnë javën e ardhshme me grevën e marinarëve të enjten dhe të premten e që do të kurorëzohet më pas me grevën e përgjithshme të sindikatave të sektrit privat dhe atij publik në datën 4 shkurt.

/ Top Channel