Leonard Olli: Rama dështoi sërish edhe në mashtrim

16 Shtator 2015, 20:19, Aktualitet CNA

Kreu i këshilltarëve demokratë në Bashkinë e Tiranës, Leonard Olli shprehet se kryeministri Rama edhe në mashtrim është dështak. Përmes një postimi në rrjetin social Facebook, ai shkruan se Kryeministri luan rolin e viktimës dhe e hedh fajin tek të tjerët. Olli e vijon shkrimin e tij, duke argumentuar se shifrat për luftën ndaj drogës e publikuara janë manipulime.

Postimi i plotë i Leonard Ollit:

Rama dështoi sërish edhe në mashtrim. Tashmë pas dy vitesh në qeverisje, vijon të luajë viktimën dhe të hedhë fajin mbi të tjerë! Një përpjekje e dëshpëruar për të mbuluar narkotrafikun që drejton ministri i preferuar, për llogari të tij, duke e çuar Shqipërinë në parametrat e frikshëm të viteve 2002-2004. Por, edhe me një korridor të ri, atë ajror. Përtej pacipësisë, i kapur me thonj e me dhëmbë, pas parimit të të akuzuarit të të tjerëve për ato që bën vete, thëne ndryshe te maturit e të tjerëve me metrin e tij, demonstroi disa shifra që as vete nuk i beson.

Mjafton vetëm një fakt për te provuar paaftësinë edhe në manipulim. Pohuan sot se kanë asgjësuar 690 mijë rrënjë cannabis, të cilat kultivohen në një sipërfaqe prej 690 mije m2 ose 69 ha, por deklaran se kjo korrespondon me 43 ha. Ose të paaftë ose manipulues të manipulimit. Nëse do ishte realisht kaq i suksesshëm, si e shpjegon faktin se sasia e cannabis të sekuestruar vetëm në Itali, në dy vitet e fundit, është rreth 400% më e lartë se në vitin 2013, që si vit elektoral ka treguesit më të ulët në kontrollin e territorit në 8 vite qeverisje të PD. Asnjë fjalë për faktin që pavarëisht se punonjësit e përkushtuar të policisë, të dënuar të punojnë si kooperativistë, nuk arrijnë të ndalin kultivimin e hashashit nga Dukagjini në Sarandë, nga Vlora në Korçë, kultivuesit vijojnë tregtimin pa as më të voglin shqetësim. Asnjë fjalë për kokainën dhe laboratorin e saj në zemër të Shqipërisë, në Elbasan.

Asnjë fjalë për flotiljen e avionëve që fluturojnë qetësisht drejt brigjeve italiane, asnjë fjalë të vetme për drejtuesit e inkriminuar në polici, që janë çirakët e ministrit në terren apo për kapurit me pras në dorë vetëm nga partnerët, si në Elbasan ashtu edhe në Vlorë. Kulmi i cinizmit ishte se në organizmin e shfaqjes së shëmtuar në Pallatin e Kongreseve, shkeli të gjitha kodet etike e ligjore, duke mbushur sallën me punonjës policie për të tretën herë që kur ka marre detyrën dhe duke involvuar edhe trupin diplomatik pabesisht në të. Ekzakt një kongres i PPSH, ku munguan vetëm ekzaltimet e pjesëmarrësve dhe thirrjet Rroftë Partia! Akuzon opozitën se i tregon të vërtetat e dhimbshme publikut dhe si struci tenton të mjegullojë agjitpropin gëbelsian.

Paralelisht, nuk harron te urdhërojë vartësin tjetër në krye të Bashkisë Tiranë, të provokoje me nostalgjiket e diktaturës dhe diktatorit, me festen famëkeqe të Pezës, duke fyer shqiptaret, si edhe për të larguar vëmendjen nga keqqeverisja apokaliptike. Jemi ne të gjithë të neveritur nga ty z. Rama. Shqiptarët nuk të kanë asnjë borxh dhe asnjë faj se je marrë peng, shume vite me pare nga krimi dhe ke dëshirë të na barazosh me veten! Vërtet po korr e po shet ato që mbolle këto dy vjet, por do të korrësh shumë shpejt edhe zemëratën e çdo shqiptari për bëmat e tua e shokëve të tu! Koha jote po mbaron dhe fundi do të jetë shumë i dhimbshëm…