Braçe ofendon deputetët e PD-së, i quan torollakë

16 Shtator 2015, 18:08, Aktualitet CNA

Deputeti socialist, Erion Braçe, i ka quajtur demokratët torollakë. Ndërsa ka publikuar shifra për luftën kundër drogës, Braçe ka thënë se në një vit është kapur një sasi më e madhe droge se në 8 vitet së bashku të kohës së demokratëve.

Ja çfarë shkruan Braçe:

Prej drekës, dëgjoj çdo 30 minuta në çdo ekran ish-ministrin e Brendshëm me rekordet më të rënda si “suksese”, deri vrasjen e 4 protestuesve mu aty ku as fashizmi nuk kish vrarë. Thotë se në raportin e Departamentit Amerikan të Shtetit janë treguar arritjet e qeverisë së PD në luftën kundër drogës!! Unë i kam përpara dhe po u tregoj numrat që shkruhen në ato raporte: Raporti i vitit 2013, që i referohet vitit 2012, ku sipas të dhënave të paraqitura në raport thuhet se: Janë kapur në total 21.2 metrik ton kanabis, kjo shifër është sa dyfishi i një viti më parë, viti 2011 (referuar kësaj të dhëne i bie që në vitin 2011 sasia e kanabisit të kapur të ketë qenë diku te 11 ton), janë kapuar 87.7 kg heroinë dhe 4.6 kg kokainë. Në vitin 2013, referuar Raportit të publikuar në vitin 2014, numrat janë ekzaktësisht këto: janë kapur në total 33 metrik ton kanabis, ndërkohë që një vit më parë ishin kapur 21.2 metrik ton; janë kapur 43.7 kg heroinë dhe 16.1 kg kokainë. Në vitin 2014, dhe ky është raporti i vitit 2015 i publikuar në mars të këtij viti, thuhet qartësisht dhe numrat janë këto: Volumi i marijuanës së kapur është 101.7 metrik ton vetëm në 9 muajt e parë të vitit 2014, në mënyrë dramatike mbi totalin prej 96 tonësh të kapur nga viti 2005 deri në vitin 2013. Pra, 101.7 ton nga një total prej vetëm 96 tonësh në 8 vjet!! Ndërkohë, që raportet ndër vite thotë qartë rritjen e sasisë së kultivuar në vend. Tani një pyetje kam për gjithë torollakët e PD: Kush është sukses në luftën kundër dogës këtu? Apo heqja e vizave? Eeeej, në vetëm një vit është kapur një sasi më e madhe se në 8 vite së bashku! Kuptoni apo jo? Mblidheni këtë ish-ministrin e Brendshëm që e keni bërë kryetar, po ju bën qesharak gjithandej; dështimi e përfshirja në krim nuk mund të jetë sukses, numrat e tregojnë shumë qartë!!