Yildiz me qëllime të qarta, Juventusi bën gati kontratën

24 Dhjetor 2025, 21:29, Sport CNA

E ardhmja e Kenan Yildiz te Juventusi mbetet një nga çështjet më të rëndësishme në axhendën e klubit bardhezi. Sulmuesi 20-vjeçar, i cili është shndërruar në një nga elementët kyç të skuadrës, synon një rinovim kontrate që të reflektojë rolin dhe rëndësinë e tij aktuale në ekip, si dhe ambiciet personale për vitet në vijim.

Juventusi pritet të rifillojë zyrtarisht bisedimet për zgjatjen e kontratës së Yildiz në javët e ardhshme. Ky proces pritet të përshpejtohet edhe nga emërimi i drejtorit të ri sportiv, Marko Otolini, i cili do të ketë një rol qendror në ndërtimin e projektit afatgjatë të klubit.

Kontrata aktuale e talentit turk skadon në qershor të vitit 2029, por duke parë peshën që ai ka marrë në skuadër, të dyja palët vlerësojnë se një marrëveshje e re është e nevojshme.

Sipas raportimeve të “La Gazetta delo Sport”, takimi i fundit mes përfaqësuesve të Juventusit dhe kampit të Yildiz ka ndodhur në fund të muajit tetor, pak para shkarkimit të trajnerit Igor Tudor.

Që nga ajo kohë, negociatat kanë mbetur në pritje, por tani pritet të rifillojnë në mënyrë më konkrete.

Aktualisht, Yildiz përfiton rreth 1.7 milionë euro në sezon. Objektivi i tij është të bëhet lojtari më i paguar i skuadrës, me një pagë prej të paktën 6 milionë eurosh në vit, shifër e krahasueshme me atë të Jonathan David. Nga ana tjetër, oferta e Juventusit varion nga 4 deri në 5 milionë euro në sezon, të shoqëruara me bonuse të lidhura si me objektivat personale të lojtarit, ashtu edhe me rezultatet e ekipit.

Diferenca mes kërkesës së lojtarit dhe ofertës së klubit vlerësohet rreth 1 milion euro në sezon. Megjithatë, çështja financiare nuk është e vetmja në tryezën e negociatave.

Yildiz kërkon gjithashtu garanci të qarta për projektin sportiv dhe ambiciet e Juventusit në të ardhmen, si në nivel kombëtar ashtu edhe ndërkombëtar.

Në aspektin sportiv, sezoni aktual ka qenë pozitiv për talentin turk. Në 22 paraqitje në të gjitha kompeticionet, Yildiz ka shënuar gjashtë gola dhe ka dhënë gjashtë asistime, duke konfirmuar rritjen e tij të vazhdueshme dhe rëndësinë në organikën bardhezi.