Vllaznia u zhvendos në Elbasan, Xhaferi: Plagë për sportin

18 Qershor 2025, 17:01, Sport CNA

Presidenti i Vllaznisë, Alban Xhaferi ka reaguar pas zhvendosjes së ndeshjet me Daugavpils në stadiumin “Elbasan Arena”.

Në një postim në profilin e tij, Xhaferi shkruan se për herë të parë në histori, Vllaznia do e luajë një ndeshje europiane larg Shkodrës.

Sipas tij, vendimi për zhvendosje ka qenë i detyruar, "për shkak të një vendimi të njëanshëm dhe të pashpjegueshëm të Bashkisë Shkodër, e cila ka vendosur që të zhvillojë koncert në stadiumin "Loro Boriçi", duke shpërfillur çdo marrëveshje zyrtare , duke injoruar plotësisht klubin, institucionet zyrtare te futbollit Shqiptar, çdo paralajmërim dhe mbi të gjitha, duke injoruar interesin e qytetit."

POSTIMI NGA ALBAN XHAFERI:

Të dashur tifozë të Vllaznisë dhe qytetarë të Shkodrës,

Sot jemi përballë një realitet të dhimbshëm:

KF Vllaznia, për herë të parë në historinë e saj 106-vjeçare, nuk do ta zhvillojë në Shkodër ndeshjen ndërkombëtare për Kupat e Europës.

Kjo është një plagë për sportin, për qytetin dhe për të gjithë ata që ndihen pjesë e kësaj historie.

Mbas komunikimeve të pandërprera me FSHF dhe UEFA kanë sugjeruar që në këtë situatë nuk kemi zgjidhje tjetër vetëm se të luajmë në një stadium tjetër të licencuar .

Jemi detyruar ta zhvendosim ndeshjen në Elbasan Arena, për shkak të një vendimi të njëanshëm dhe të pashpjegueshëm të Bashkisë Shkodër, e cila ka vendosur që të zhvillojë koncert në stadiumin "Loro Boriçi", duke shpërfillur çdo marrëveshje zyrtare , duke injoruar plotësisht klubin, institucionet zyrtare te futbollit Shqiptar, çdo paralajmërim dhe mbi të gjitha, duke injoruar interesin e qytetit.

KF Vllaznia është udhëhequr në këtë situatë nga një parim i vetëm: të mbrojë dinjitetin e klubit dhe të mos lejojë që për hir të eventeve të përkohshme të cenohet emri dhe serioziteti i tij në arenën ndërkombëtare.

E them me bindje: ky nuk është vendim përçarës, por vendim i pjekur, i matur dhe i drejtë.

Jam i bindur që çdo autoritet që ndjek me kujdes zhvillimet në vend, do ta kuptojë qartë ku qëndron përgjegjësia.

Tifozë të Vllaznisë, koha për t’u bërë një!

Ne do të luajmë në Elbasan, por me zemrën në Shkodër.

Ejani të gjithë bashkë, me zërin dhe ngjyrat kuqeblu, që të tregojmë qytetari dhe ta mbështesim djemtë tanë si asnjëherë tjetër në rrugëtimin tonë Europian.

Vllaznia është krenaria jonë dhe nuk përkulet para askujt!