E fundit!

22:02 Aktualitet

Lamallari i përgjigjet Kikisë: Janë dhunuar efektivët, policët kanë vepruar sipas ligjit

Ministri i Brendshëm, Besfort Lamallari i është përgjigjur...

Vendimi, të ardhurat e Norvegji-Izrael do shkojnë për Gazën

16 Shtator 2025, 16:57, Sport CNA

Më 11 tetor, Norvegjia do të përballet me Izraelin në Oslo, në një ndeshje të vlefshme për kualifikueset e Botërorit 2026. Takimi, i cili zhvillohet në stadiumin “Ullevaal”, është cilësuar si një sfidë e rëndësishme sportive, por vëmendja nuk është vetëm te futbolli. Përballja vjen në një moment të ndjeshëm, për shkak të konfliktit në Lindjen e Mesme dhe situatës humanitare në Gaza.

Federata Norvegjeze e Futbollit ka vendosur të japë një mesazh të fortë solidariteti, duke njoftuar se të gjitha të ardhurat nga shitja e biletave do t’i dhurohen organizatës “Mjekët pa Kufij”. Fondet do të përdoren për të mbështetur ndërhyrjet emergjente në Gaza dhe zonat përreth, të prekura nga lufta.

Vendimi u komunikua publikisht nga presidentja e federatës, Lise Klaveness, e cila deklaroi se Norvegjia, si pjesë e FIFA-s dhe UEFA-s, ka detyrimin të luajë ndeshjen kundër Izraelit, por nuk mund të qëndrojë indiferente ndaj krizës humanitare. Sipas saj, nisma për të dhuruar të ardhurat është një formë për të kombinuar detyrimin sportiv me ndjeshmërinë ndaj situatës së rëndë që po përjetojnë civilët.

Ky veprim ka marrë mbështetje edhe nga organizata partnere. Lindis Hurum, sekretare e përgjithshme e “Mjekëve pa Kufij” në Norvegji, e cilësoi iniciativën si një hap të madh, duke theksuar se futbolli ka aftësinë të bashkojë njerëzit edhe në momentet më të vështira. Sipas saj, vendimi i federatës norvegjeze përputhet me misionin e organizatës: të shpëtojë jetë dhe të lehtësojë vuajtjet, pa dallime fetare, etnike apo sociale.

Iniciativa është pritur pozitivisht edhe nga sektorë të biznesit norvegjez. Një prej grupeve më të mëdha të investimeve në vend ka vendosur të mbështesë kauzën, duke dhuruar 3 milionë korona, rreth 260 mijë euro, përtej të ardhurave të biletave. Kompania ka zgjedhur të mbetet anonime, duke theksuar se kontributi synon vetëm ndihmën humanitare. Ky nuk është rasti i parë kur struktura të ndryshme norvegjeze japin mbështetje për projekte të lidhura me Gazën. Në të kaluarën, janë dhuruar mbi 500 mijë korona për programe sportive për fëmijët palestinezë, në bashkëpunim me Federatën e Futbollit të Palestinës.

Falë kësaj nisme, pritet që stadiumi i Oslos të mbushet me tifozë që nuk do të ndjekin vetëm një ndeshje futbolli, por edhe do të bëhen pjesë e një mesazhi solidariteti. Norvegji-Izrael, përtej vlerës sportive dhe rëndësisë në renditjen për Botërorin 2026, do të jetë një sfidë që shkon përtej kufijve të fushës së blertë, duke u kthyer në një ngjarje me ndikim humanitar.