web counter
LEXO PA REKLAMA!

SHKARKO APP

App Store
Google Play

Shpërthen Memelli: Brez që përjeton futbollin nga "Instagram"-i, papërgjegjshmëri totale

27 Tetor 2023, 16:30, Sport CNA

Shpërthen Memelli: Brez që përjeton futbollin nga

Trajneri i Vllaznisë, Migen Memelli, u shfaq i zhgënjyer nga skuadra, pas humbjes me Kukësin.

Për "MCN TV", Memelli deklaroi se lojtarët, për të cilët tha se e përjetojnë futbollin nëpërmjet "Instagram"-it, treguan papërgjegjshmëri totale, me rastet e shpërdoruara.

"Të krijosh kaq shumë, në një fushë si kjo, që nuk i ka parametrat për futboll, është tepër, por e pafalshme si humbëm rastet. Një papërgjegjshmëri totale. Detyra ime si trajner është të marr përgjegjësitë dhe të çoj lojtarët te porta. Atë që bëmë në Korçë, e zhbëmë sot.

Të mos harrojmë, që dy lojtarët që luajnë në linjat poshtë, mbrojtësi i majtë dhe i djathtë, nuk luajnë në pozicionin e tyre. Nuk mund të shtyjmë dot sipër me lojtarë që nuk kanë këmbën e tyre.

Ajo çka vlen të theksohet, është se problemi nuk qëndron se nuk shtuam forca më tepër, por nuk kishim përqendrim te porta. Është një brez që e përjeton futbollin nëpërmjet 'Instagram'-it, totalisht të papërgjegjshëm. Ishte ndryshe koha jonë, kur e shikonim si një mundësi të artë, për të ardhmen dhe jetën tonë.

Nuk mund ta konceptoj dot që në këto katër muaj, që Balaj 33-vjeçar, stërvitet më shumë se një 17-vjeçar. Lojtarët duhet të shtojnë volumin, sidomos pjesa e sipërme e sulmit, për të shfrytëzuar rastet. Jam njeri që marr përgjegjësitë e mia, por duhet të jemi pozitivë dhe të ecim me pozitivitet. Sot dolëm nga një ndeshje, që duhet ta kishim fituar. Të gjithë duhet të ngrihemi. Nëse do fitonim sot, do flisnim për një skuadër që ka vazhdimësi. Kjo na ka munguar këto javë", deklaroi Memelli.





Lajmet e fundit nga