E fundit!

13:01 Aktualitet

Incidentet në protestë/ 17 protestues dhe efektivë dërgohen në spital për ndihmë mjekësore

Një grup qytetarësh vijojnë ende qëndrimin në protestën pa...

Real Madrid ndryshon emrin e stadiumit

28 Dhjetor 2024, 16:06, Sport CNA

Stadiumi i ri i Real Madrid, tashmë ka marrë një drejtim të ri në aspektin e marketingut dhe identitetit të tij. Në vijim stadiumi i madrilenëve do të quhet vetëm “Bernabeu”, duke hequr emrin e plotë “Santiago Bernabéu”, që për dekada ka nderuar presidentin legjendar.

Ky ndryshim është kufizuar në aspektin komercial dhe në përpjekjet për të krijuar një markë më moderne e të shkurtër. Në faqen zyrtare të internetit, në profilet e rrjeteve sociale dhe në produktet e tregtuara nga klubi, emri i stadiumit përdoret vetëm si “Bernabéu”.

Në fasadën e re të stadiumit, testet fillestare për shfaqjen e emrit treguan vetëm mbiemrin “Bernabéu”, pa përmendur të plotë emrin historik të presidentit. Kjo qasje ka ngritur diskutime mes tifozëve të cilët, pavarësisht çdo ndryshimi komercial, vazhdojnë dhe do të vazhdojnë ta quajnë stadiumin “Santiago Bernabéu”. Ky ndryshim ka gjasa të jetë një hap drejt mundësisë për të shtuar një sponsor komercial në emrin e stadiumit në të ardhmen. Një vendim i tillë do të kërkojë miratimin e Asamblesë së Anëtarëve të klubit, duke qenë se Real Madrid, ndryshe nga shumë klube të tjera, ka një strukturë të bazuar te pronësia e anëtarëve.

Pavarësisht tensioneve të mundshme që mund të krijohen mes traditës dhe modernizimit, klubi është i përqendruar në maksimizimin e të ardhurave përmes stadiumit të ri. Real Madrid është një prej organizatave sportive më të suksesshme financiarisht në botë. Bernabéu nuk është më vetëm një arenë futbolli, por një hapësirë shumëfunksionale që gjeneron të ardhura masive për klubin. Stadiumi i modernizuar ofron tetë hapësira të ndryshme për organizimin e eventeve, duke përfshirë fushën e lojës, sallën e konferencave dhe zonën miks. Këto hapësira janë të përshtatshme për aktivitete të ndryshme si koncerte, kongrese, festa dhe mbrëmje gala.

Veçanërisht, fusha e stadiumit mund të transformohet në një hapësirë për 5 mijë persona ose për 3 mijë të ftuar në një darkë gala. Me kapacitetin për t’u shndërruar në një teatër me 4 mijë vende, stadiumi i ri është një qendër shumëfunksionale që e tejkalon funksionin tradicional të një impianti sportiv.

Modernizimi i stadiumit nuk ka kaluar pa sfida. Probleme me izolimin akustik dhe organizimin e koncerteve kanë reduktuar disa të ardhura dhe kanë krijuar tensione me kompanitë që menaxhojnë këto evente. Megjithatë, klubi është i përkushtuar për të përmirësuar çdo aspekt të funksionimit të stadiumit. Për Real Madrid, Bernabéu i ri është më shumë se një vend i ndeshjeve sportive, është një makineri për të ardhura që do të ndihmojë në forcimin e pozicionit të klubit si një lider global, jo vetëm në fushën e futbollit, por edhe në industrinë e eventeve dhe biznesit.