E fundit!

08:57 Aktualitet

Nis protesta para Parlamentit/ Policia zgjeron perimetrin e sigurisë, debate me qytetarët

Ka nisur protesta në sheshin para Parlamentit. Në terren k...

Milani vuan ndaj Romës, Interi merr “asist” në krye

25 Janar 2026, 23:09, Sport CNA

Java e 22-të e Serisë A solli barazimin e parë sezonal për Romën, e cila deri në këtë pikë të kampionatit kishte regjistruar vetëm fitore ose humbje. Në stadiumin “Olimpiko”, verdhekuqtë ndalën Milanin në barazimin 1-1, një rezultat që i lejon Interit të shkëputet në krye me pesë pikë avantazh ndaj kuqezinjve dhe që e ngjit Romën në të njëjtën kuotë pikësh me Napolin.

Në pjesën e parë, Roma ishte skuadra dominuese, duke kontrolluar lojën dhe duke krijuar disa raste të pastra shënimi.

Malen rezultoi shumë aktiv në zonën kundërshtare, por u ndal disa herë nga ndërhyrjet vendimtare të portierit Majk Menjo dhe, në një rast tjetër, gaboi në finalizim duke dërguar topin jashtë.

Edhe Çelik me Kone provuan të gjenin rrugën e rrjetës, por u përballën me një Menji në formë të shkëlqyer, i cili realizoi të paktën katër pritje vendimtare, duke e mbajtur Milanin në lojë deri në pushim.

Në pjesën e dytë, Milani ndryshoi qasje, duke ngritur vijën e presionit dhe duke u shfaqur më shpesh në zonën e Romës.

Ky ndryshim u shpërblye në minutën e 61-të, kur De Vinter realizoi golin e avantazhit pas një goditjeje këndi, duke shfrytëzuar një pasiguri në mbrojtjen vendase.

Pas golit të pësuar, trajneri Gasperini reagoi duke riorganizuar repartin ofensiv, me aktivizimin e Vaz dhe Pelegrinit.

Ndryshimet sollën efektin e kërkuar dhe Roma arriti barazimin në minutën e 74-t. Pas një prekjeje të topit me dorë në zonë nga Bartesagi, gjyqtari akordoi penallti për verdhekuqtë, të cilën kapiteni Lorenzo Pelegrini e shndërroi në gol, duke vendosur ekuilibrin në rezultat.

Minutat e mbetura nuk sollën ndryshime në shifra, me të dyja skuadrat që administruan barazimin.

Me këtë rezultat, Roma dhe Milani ndanë nga një pikë, në një ndeshje që ndikoi drejtpërdrejt në renditjen e kreut të tabelës.

Roma ngjitet në vendin e tretë me 43 pikë, në të njëjtën kuotë me Napolin, ndërsa Milani mbetet pas Interit, por vazhdon pa humbje prej 21 ndeshjesh.