E fundit!

07:44 Aktualitet

Rama mbledh grupin dhe ministrat/ Priten lëvizje të forta në qeveri

Kryeministri Edi Rama do të mbledhë sot grupin parlamentar...

Milan-Como në Australi, drejt anulimit. Lëvizja e fundit

10 Dhjetor 2025, 15:50, Sport CNA

Lëvizja e planifikuar prej muajsh për zhvillimin e ndeshjes së Serie A midis Milan-it dhe Como-s në Perth të Australisë po shkon drejt anulimit. Sipas informacioneve të orëve të fundit, përballja e 8 shkurtit, e cila dukej e konfirmuar nga të gjitha palët, pritet të mos zhvillohet jashtë Italisë. Presidenti i Ligës së Serie A, Simoneli, kishte deklaruar së fundmi se marrëveshja ishte në fazat përfundimtare, por disa kushte shtesë të vendosura nga Konfederata Aziatike e Futbollit kanë ndryshuar skenarin.

Problemi kryesor lidhet me kërkesën që ndeshja të gjykohet nga arbitra australianë, një kusht që nuk ishte parashikuar në fazën e parë të bisedimeve. Ky kriter, së bashku me disa elementë të tjerë organizativë, po shtyjnë drejt vendimit për të anuluar udhëtimin në Australi.

Aktualisht, e vetmja mundësi që mund të rikthejë skenarin fillestar është një ndërhyrje e FIFA-s, por deri tani nuk ka sinjale të qarta në këtë drejtim.

Me prishjen e kësaj marrëveshjeje, duhet të përcaktohet edhe vendi dhe data e re e ndeshjes. Opsioni i zhvillimit të takimit në "San Siro" më 8 shkurt nuk është i mundur, pasi stadiumi do të jetë i angazhuar nga aktivitetet e lidhura me ceremoninë e hapjes së Lojërave Olimpike Milano–Cortina, të planifikuar për 6 shkurt.

Për shkak të rregullores së kampionatit, Milan-i nuk mund të zhvendosë ndeshjen në një impiant tjetër, duke e detyruar Ligën të gjejë një datë alternative që të mos përplaset me kalendarin e të dyja skuadrave.

Duke qenë se as Milan-i dhe as Komo nuk marrin pjesë në kompeticione europiane, mundësitë hapen në datat 17 ose 18 shkurt, si edhe 24 ose 25 shkurt. Megjithatë, këto data varen edhe nga kalendari i Inter-it, pasi stadiumi ndahet mes dy ekipeve dhe angazhimet e mundshme të zikaltërve në "play-off" të Champions League mund të ndikojnë në vendimin përfundimtar.

Një tjetër mundësi që është përjashtuar paraprakisht është përmbysja e rendit të fushës. Ndeshja e kthimit mes dy skuadrave është planifikuar për 15 janar në Komo, por më 14 janar në "San Siro" do të luhet Inter–Lecce, një takim i shtyrë më herët për shkak të Superkupës. Kjo e bën të pamundur zhvendosjen e ndeshjes Milan–Como në atë datë.

Në këtë mënyrë, ndërsa pritej që Serinë A të zhvillonte ndeshjen e parë zyrtare në historinë e saj në Australi, dinamika e re organizative e ka vënë projektin në pikëpyetje. Vendimi përfundimtar pritet në ditët në vijim, por gjithçka tregon se sfida do të luhet në Itali dhe jo në Perth, ashtu si ishte parashikuar fillimisht.