web counter
LEXO PA REKLAMA!

SHKARKO APP

App Store
Google Play

Magani: Jam i bindur që kualifikohemi, nuk përsëriten më gabimet

13 Janar 2025, 15:31, Sport CNA

Magani: Jam i bindur që kualifikohemi, nuk përsëriten më

Tirana kërkon të hedhë pas krahëve humbjen ndaj Vllaznisë dhe momentin e keq në kampionat, ndërsa synon kualifikimin në Kupën e Shqipërisë, aty ku përballet me Bylisin.

Në prag të kësaj përballjeje, trajneri i bardhebluve, Gugash Magani, deklaroi se presioni në ekip është shumë i madh. Tekniku i kryeqytetasve u shfaq besimplotë për një kualifikim të skuadrës së tij.

“Presioni është i madh. Situata nuk është e mirë. Gjithsesi, unë e thashë edhe pas ndeshjes me Vllazninë që humbëm prej gabimeve tona. Në këto momente duhet të jemi shumë të bashkuar, presionin ta mbajmë ne, çunat duhet të jenë sa më të qetë, kështu kemi punuar këto ditë. Një skuadër që nuk e mban presion do ketë probleme. Ne jemi të vendosur për t'u futur, për t'u kualifikuar dhe kam bindjen që do të fitojmë ndeshjen."

Magani u ndal te ndeshja e kaluar, ku skuadra e tij u përmbys nga 1-0 në 2-1, duke thënë se është analizuar gjithçka dhe nuk do të ndodhë më e njëjta shthurje në të ardhmen.

"Ne analizojmë çdo gjë që ndodh, mbaj përgjegjësitë e mia, kur jemi 1-0 duhet të menaxhosh rezultatin. Në çdo moment kur je 1-0 dhe ke raste të tjera, duhet të kujtoj Tiranën e disa viteve që nuk falte duke shënuar. Ne e kemi analizuar dhe nuk do të ndodhë më.

Situata është shqetësuese, çdo njeri ka përgjegjësitë e veta, përgjegjësinë kryesore e kam unë. Kemi kapacitet të zgjidhim situatën."

Në lidhje me merkaton, Magani u shpreh se ekipi do të kompletohet në 10 ditët e ardhshme dhe nuk pret më afrime.

"Organika po plotësohet, për 10 ditë besoj jemi të kompletuar. Në qoftë se dokumentacioni është i plotësuar atëherë lojtarët janë gati. Nuk pres asgjë nga merkatoja, topin e kemi ne dhe duhet të luajmë”, u shpreh Magani.

Ndeshja Tirana-Bylis, e vlefshme për fazën e 1/8-ve në Kupën e Shqipërisë, do të luhet ditën e martë, duke nisur nga ora 13:00.





Lajmet e fundit nga