Elon Musk dëshiron të blejë klubin e madh anglez

7 Janar 2025, 18:14, Sport CNA

Miliarderi Elon Musk, një ndër figurat më të spikatura të teknologjisë dhe inovacionit në botë, ka shfaqur interes për të hyrë në botën e futbollit. Sipas raportimeve të fundit, Musk po shqyrton mundësinë e blerjes së klubit të njohur anglez, Liverpool.

Ky lajm mori konfirmim nga një deklaratë e babait të tij, Errol Musk, i cili tha se ka një lidhje personale me këtë klub, pasi gjyshja e Elon Musk ka lindur në Liverpul. “Nuk mund të flas për këtë, sepse pronarët aktualë mund të rrisin çmimin. Është diçka që ai e dëshiron, por nuk do të thotë se ai po e blen.”, tha Errol Muks.

Raportimet e para për interesin e Elon Musk për Liverpool u publikuan javën e kaluar, ku thuhej se miliarderi po përgatiste një ofertë për të blerë klubin.

Sipas “Forbes”, klubi anglez vlerësohet me një çmim prej rreth 5 miliardë eurosh, duke e bërë atë një investim madhor edhe për një miliarder si Elon Musk. Aktualisht, Liverpool është në pronësi të “Fenëay Sports Group” (FSG), një grup amerikan që e ka blerë klubin në vitin 2010 dhe ka rikthyer suksesin e ekipit, përfshirë triumfin në Premier League dhe Ligën e Kampionëve në vitet e fundit.

Pavarësisht interesit të Musk, nuk dihet nëse “Fenway Sports Group” është i gatshëm të shesë klubin. Deri tani, pronarët aktualë nuk kanë konfirmuar ndonjë plan për të hequr dorë nga Liverpool, edhe pse më parë janë përfolur për oferta të tjera të mëdha nga investitorë të ndryshëm.

Ndërkohë, futbolli përfaqëson një sektor të ri dhe sfidues për Musk, i cili deri më tani ka qenë i fokusuar kryesisht në industrinë e teknologjisë, energjisë së rinovueshme dhe hapësirës. Megjithatë, duke marrë parasysh suksesin e tij të deritanishëm në kompani si Tesla, SpaceX dhe Neuralink, një investim në futboll mund të shihet si një zgjerim i portofolit të tij global dhe një mundësi për të ndikuar në këtë sport të ndjekur masivisht.

Për momentin, gjithçka mbetet në kuadrin e spekulimeve dhe dëshirave. Megjithatë, nëse një marrëveshje për blerjen e Liverpool do të finalizohet, ajo do të përfaqësojë një kapitull të ri dhe emocionues për këtë klub të famshëm dhe për vetë Elon Musk, si një ndër njerëzit më ambiciozë të epokës sonë.