Derbi Milan-Inter, Inzaghi dhe Conceicao "ndezin" supersfidën

2 Shkurt 2025, 13:25, Sport CNA

Kjo e diel rezervon një nga ndeshjet më të bukura dhe të luftuara në Europë, siç është derbi i Milanos. Interi dhe Milani përballen mes tyre, në një sfidë ku spektakli është i garantuar. Pas dy humbjeve këtë sezon ndaj kuqezinjve, te Interi presin hakmarrjen. Në prag të kësaj përballje, foli trajneri i Interit, Simone Inzaghi, i cili deklaroi se skuadra e di se çfarë përfaqëson një derbi, ndërsa pret vazhdimësi. Ndër të tjera, ai tha se në derbin e parë, Milani e meritoi fitoren, ndërsa për humbjen në finalen e Superkupës, u shpreh se goli erdhi pas një faulli ndaj Asllanit.

“Ne e dimë së çfarë përfaqëson një derbi. Do të jetë një ndeshje e luftuar dhe me gracka, sepse Milani është një ekip i madh dhe me cilësi. Duhet një Inter shumë i mirë, i vendosur dhe agresiv në fushë. I dimë vlerat e kundërshtarit. Këtë sezon kemi humbur dy derbi. Në derbin e parë na mposhtën me meritë, në Superkupë duhet t’i kishim menaxhuar ndryshe situatat. Goli i tyre i parë erdhi pas një faulli ndaj Asllanit. Açerbi dhe Çalhanoglu janë mirë dhe gati të na japin ndihmën e tyre. Hakan ka pasur më shumë probleme këtë sezon, në krahasim me të kaluarën. Gjasat janë që ai të mos luajë nga fillimi, por të shohim. Nga skuadra dua të shikoj vazhdimësinë që kemi pasur nga Gushti. Dua vetëm ta vlerësoj ekipin për atë që ka bërë gjatë këtyre muajve, në kampionat dhe Champions. Duhet të ruajmë këtë vazhdimësi. Derbi jonë i parë ishte ndeshja jonë më e keqe pas 30 përballjeve sezonale. Te i dyti humbëm pas një faulli të pa dhënë ndaj Asllanit dhe një goli nga goditja e dënimit. Në futboll ka edhe momente të tilla. Mendova se në muajin Shkurt do të kishim një kalendar më të lirë, por për shkak të ndryshimeve, nuk mund të kemi pushime. Napoli, Inter dhe Atalanta kanë marrë një avantazh dhe janë favoritë për titullin kampion. Jam i fokusuar vetëm te skuadra ime”, deklaroi Inzaghi.

Në krahun tjetër, trajneri i Milani Sergio Conceicao, pranoi vështirësitë në këtë sfidë, ndërsa referuar raportimeve të fundit për përplasje, tha se janë gënjeshtra.

“Jam përballur disa herë me Interin në Champions me Porton. Lojtarët zikaltër e njohin njëri-tjetrin dhe luajnë bashkë prej kohësh. Duhet të gjejmë pikat e dobëta të tyre. Unë e kam thënë që një muaj merkato në Janar është shumë, veçanërisht për anën mendore të lojtarëve. Megjithatë ne vazhdojmë të punojmë për ndeshjen dhe kjo është gjëja e rëndësishme. Kam lexuar shumë gënjeshtra për atë që ndodh në dhomat e zhveshjes. Nuk është e lehtë në një periudhë si kjo, me merkaton e hapur dhe lajmet e rreme rreth ekipit. Nuk flas për atë që ndodh brenda grupit, thjesht duhet të jemi të fokusuar për të luajtur një lojë të mirë dhe për të marrë fitoren. Është një periudhë delikate, në të cilën flitet shumë për merkaton dhe gjëra të tjera. Unë e kuptoj se në media është e rëndësishme të flitet për merkaton, por ne jemi të fokusuar te Interi. Te Milani ka ende shumë për të përmirësuar. Çdo trajner kërkon perfeksionin për ekipin e tij. Në një ndeshje Milan-Inter nuk ka favorit. Të tilla sfida marrin jetë kur arbitri jep startin. Nëse merkato do të ishte e mbyllur, do të ishte më mirë, por nuk është e mundur prandaj duhet të jemi të fokusuar te puna jonë”, deklaroi Conceicao.

Ndeshja Milan-Inter do të luhet mbrëmjen e kësaj të diele duke nisur nga ora 18:00, në stadiumin “San Siro”.