Argjentina fiton miqësoren

14 Nëntor 2025, 21:06, Sport CNA

Argjentina ka arritur një fitore 2-0 në miqësoren e zhvilluar në transfertë përballë Angolës, një ndeshje që përkoi me aktivitetet zyrtare të 50-vjetorit të pavarësisë së vendit afrikan. Përballja u zhvillua në një atmosferë festive, por edhe me intensitet të lartë nga skuadra vendase, e cila kërkoi të tregonte nivel përballë kampionëve të botës.

Angola e nisi takimin me ritëm të lartë dhe krijoi rastin e parë të rrezikshëm me Banza, i cili provoi të dërgonte topin mbi portierin Ruli, por tentativa u neutralizua në kohë. Argjentina u përpoq të vendoste kontrollin në mesfushë, dhe në minutën e 19-të Lionel Messi ishte pranë golit të parë, por portieri Hugo Markes reagoi saktë duke larguar goditjen e kapitenit argjentinas.

Pavarësisht dominimit territorial të Argjentinës, Angola u mbrojt mirë dhe kërkoi të shfrytëzonte kundërsulmet, kryesisht me Banzën që mbeti lojtari më aktiv i skuadrës vendase. Argjentina humbi një tjetër mundësi të pastër me Mesin, që goditi jashtë nga një pozicion i favorshëm. Kur dukej se pjesa e parë do të mbyllej pa gola, Messi asistoi për Lautaro Martinez në zonë, dhe sulmuesi i Interit shënoi me një gjuajtje, që shkoi mes këmbëve të portierit, duke i dhënë avantazhin skuadrës së Lionel Skalonit.

Në pjesën e dytë, Angola nuk u tërhoq dhe kërkoi të mbetej në lojë, duke pasur një rast të mirë me Luvumbo, i cili nuk arriti të finalizonte një krosim në zonë. Argjentina menaxhoi lojën, duke shmangur rreziqet dhe duke përdorur qarkullimin e topit për të ulur ritmin e vendasve.

Loja dukej e mbyllur, por në minutën e 82-të Lionel Messi realizoi golin e dytë. Pas një depërtimi individual, ai u ndal fillimisht nga një ndërhyrje e Buatu, por rikuperoi menjëherë topin dhe goditi saktë për të vulosur rezultatin 2-0.

Angola, që përfundoi e katërta në grupin e saj eliminator me dy fitore në dhjetë ndeshje, nuk arriti të sigurojë një vend për Botërorin 2026.

Ndërkohë, Argjentina, e cila e mbylli fazën kualifikuese në krye të tabelës, po vijon përgatitjet për ruajtjen e statusit të kampiones së botës. Miqësorja ndaj Angolës shënon fitoren e saj të shtatë në nëntë ndeshje të vitit 2025.