web counter
LEXO PA REKLAMA!

SHKARKO APP

App Store
Google Play

E fundit!

x

Sëmundja te bagëtitë e imta/ Fermerët: Murtaja erdhi nga importi i pakontrolluar

1 Korrik 2025, 16:43, Sociale CNA

Sëmundja te bagëtitë e imta/ Fermerët: Murtaja erdhi nga

Agjencia e Shërbimit Veterinar ka ndërmarrë disa aksione ndërgjegjësuese me fermerë në zonat rurale për të kufizuar përhapjen e mëtejshme të sëmundjes së murtajës tek dhentë.

 “Prej 4 ditësh kemi nisur takimet me fermerët në bashkëpunim me pushtetin vendor. Këto takime po zhvillohen me kryetarët e njësive administrative dhe kryepleqtë e fshatrave. Thelbi është sensibilizimi i të gjithë fermerëve për rëndësinë e kufizimit të përhapjes së kësaj sëmundje. Për momentin, e vetmja zgjidhje është bllokimi i lëvizjes së kafshëve dhe fermerët duhet ta kenë të qartë, pasi duhet të mbahen të izoluara në fermë dhe të shmangin kontaktet me fermat e tjera. Ndalohet rreptësisht edhe futja e kafshëve të reja në fermë, po ashtu edhe dalja e tyre. Deri tani kemi gjetur mirëkuptimin e fermerëve. Vështirësitë në ferma janë të mëdha sepse kufizimi sjell probleme edhe në gjetjen e ushqimit”,-tha Andi Bilali, Drejtor i  Agjencisë Rajonale e Shërbimit Veterinar Shkodër.

Për fermerët ky është një moment i vështirë. Ata shprehen se kurrë nuk janë përballur me këtë sëmundje tek të imtat dhe dyshojne se përhapja e murtajës vjen si shkak i importit kontrabandë të kafshëve që futen nga shtete të tjera në Shqipëri.

“Kam 150 copë dele të imta. Masat i kemi marrë sepse delet janë në stallë të izoluara dhe nuk i nxjerrim për të kullotur për shkak të sëmundjes që është përhapur. Të frikësuar jemi sepse këtë sëmundje e ka sjellë vetë shteti se jo se e kemi patur. Vijnë bagëtitë nga Mali i Zi, nga Greqia dhe prej kudo në një kohë që ne i kemi patur bagëtitë të pastra gjithmonë. Mendoj se kjo ka ardhur vetëm si shkak i bagëtive të importit. Tani nuk i lëviz nga vendi, veterinerët kanë ardhur dhe i kanë parë dhe deri tani jam mirë”,-thonë fermerët.

“Unë kam 180 dele. Deri tani nuk kemi pasur ndonjë rrezik. Kemi marrë masat tona për t’i lënë të veçuara në mënyrë që mos t’i përziejmë. Tjetër gjë s’kemi çfarë të bëjmë. Unë as nuk blej, as nuk shes sepse atë tufë e kam rritur vetë. Aktualisht ushqehen në kullosë sepse livadhet e kemi të ndara dhe në livadhet e mia nuk futet askush. Jam 72 vjeç dhe këtë sëmundje nuk e kam njohur asnjëherë, nuk e kam dëgjuar kurrë më parë”,-thonë fermerët.

Deri më tani ende nuk ka asnjë vendimmarrje për dëmshpërblimin e dhenve të asgjësuara pas shfaqjes së sëmundjes të murtajës.

“Për momentin nuk ka një VKM të tillë për arsye se nuk ka qenë e parashikuar dhe kjo është një sëmundje që vjen për herë të parë në Shqipëri. Ministria e Bujqësisë e ka marrë me shumë angazhim dhe shumë seriozitet këtë pjesë dhe po bëhen studimet përkatëse dhe me shumë gjasa do të bëhet edhe kompensimi financiar i fermave ku u asgjesuan dhentë”,-tha Bilali.

Aktualisht janë 475 krerë të imta të asgjësuara në qarkun Shkodër, përafërsisht në një muaj, që kur u shfaq rasti i parë i murtajës te dhentë në një fermë në Postribë. Një masë parandaluese për përhapjen e mëtejshme është izolimi i fermave dhe kontrollet e institucioneve në terren./CNA





Lajmet e fundit nga