E fundit!

16:31 Politikë

Ndryshime në qeveri/ Ja kush lirohet nga detyra

Qeveria ka njoftuar sot disa vendime të reja. Mes ty...

Lirim hapësire brenda dy muajsh/ Tregtarët e Zdrales në Shkodër shprehin shqetësimin e tyre

7 Korrik 2025, 15:25, Sociale CNA

Lirim hapësire brenda dy muajsh/ Tregtarët e Zdrales në

Tregtarët e Zdrales në Shkodër kanë reaguar duke mos qenë dakord me një njoftim që kanë marrë nga Komuniteti Mysliman për lirimin e hapësirave tregtare brenda dy muajsh për shkak se ai treg pritet të shembet për t’u zhvilluar një projekt tjetër. Fillimisht tregtarët ishin pranë Bashkisë Shkodër duke shprehur shqetësimet e tyre.

Ja si shprehen tregtarët për këtë rast:

“Ku duan që të na çojnë ne se jemi 300 dyqane aty. Komuniteti Mysliman është bamirës, jo të veprojë duke nxjerrë qytetarët e vet jashtë dhe të na lërë pa bukë. Bashkia mundohet që të jetë dorëjashtë”.

“Duan ta prishin tregun, të bëjnë aty gradaçelë dhe të pasurohen dy veta dhe të mbesin në krizë financiare dy mijë veta”.

“Myftinia kur shkojmë në xhami thotë që të pasurit duhet ta ndajnë pasurinë me të varfrit dhe myftinia kërkon që t’i heqë kafshatën e bukës të varfërve dhe t’ua japë të pasurve sepse 5 mijë euro metri katror nuk jemi as në Paris, as në Barcelonë dhe nuk jemi duke shitur drogë aty që të na e lënë 5 mijë euro metrin”.

Zëvendëskryetari i Bashkisë Shkodër, Rudin Beka, priti një përfaqësi të tregtarëve të Zdrales duke thënë se bashkia është jashtë në këtë çështje sepse bëhet fjalë për një pronë private.

“Diskutuam në lidhje me qiradhënien dhe qiramarrjen dhe një letër që ka ardhur për sa i përket investimit që ka për t’u bërë në atë zonë. Do të diskutojmë dhe do të marrim parasysh kërkesat e nevojës që kanë sepse ka një afat që është mesi i muajit gusht për të dalë tregtarët nga ajo zonë që duhet të theksohet se është një pronë private dhe që ka një marrëdhënie biznes-biznes mes dy palëve. Në rastin konkret bashkia do ta shohë situatën më mirë dhe do të kuptojë për të qartësuar në maksimum si për rastin e biznesit të Zdrales që kanë vite atje që shesin dhe janë rreth 500 familje po ashtu për të ndjekur edhe anën ligjore. Në këtë rast bashkia është pak më jashtë kësaj çështjeje sepse është një marrëdhënie mes një qiramarrësi dhe qiradhënësi”,-tha Beka.

Tregtarët shkuan edhe te myftinia Shkodër, por u shprehën se nuk gjetën asnjë zgjidhje.

“I kërkuam që të qëndrojmë deri në fund të vitit sepse kemi gjithë atë mall brenda dhe nuk kemi ku ta çojmë. Ata nuk toleruan fare, ishin 3 përfaqësues të myftinisë”.

“Diskutuam me kryesinë e myftinisë dhe nuk na dhanë asnjë zgjidhje. Unë jam myslimane dhe te kjo derë e myftinisë nuk gjetëm asnjë zgjidhje”,-thotë një tregtare.

Tregtarët do të vijojnë reagimet dhe përpjekjet e tyre për të gjetur një zgjidhje në lidhje me këtë situatë, duke pasur frikën se do të mbesin jashtë projektit të ri që mund të ndërtohet në zonën e Zdrales në Shkodër nga Myftinia në bashkëpunim me shtetin shqiptar./CNA