E fundit!

20:00 Aktualitet

FOTOLAJM/ "Populli të uron", protestuesit torta dhe dhurata Ramës për ditëlindje

Në ditën e 35-të të protestës që përkon dhe me ditëlindjen...

Inaugurohet Akademia e Arteve Marciale në Bilisht, një mundësi e re për të rinjtë

30 Prill 2026, 09:26, Sociale CNA

Qyteti i Bilishtit ka tashmë një hapësirë të re sportive në shërbim të të rinjve. Këtë të mërkurë është inauguruar zyrtarisht Akademia e Arteve Marciale, një nismë që synon të promovojë sportet luftarake dhe të krijojë mundësi të reja për aktivizimin e fëmijëve dhe të rinjve në aktivitete sportive.

Ceremonia e hapjes u zhvillua në ambientet e Qendrës Kulturore të Fëmijëve “Andrea Balli”, ku të pranishëm ishin përfaqësues të pushtetit vendor, trajnerë, sportistë, si dhe qytetarë të kësaj bashkie.

Aktiviteti u shoqërua me demonstrime të teknikave të taekwondo-së dhe ndeshje boksi, të cilat sollën një atmosferë të veçantë te publiku.

Kjo akademi vjen si një përgjigje konkrete ndaj nevojës që kanë pasur të rinjtë e zonës për të praktikuar sporte të tilla, pa qenë të detyruar të udhëtojnë drejt qyteteve të tjera.

Inaugurohet Akademia e Arteve Marciale në Bilisht, një mundësi e

"Një mundësi e artë për qytetin e Bilishtit. U hap Akademia e Arteve Marciale në këtë qytet, me mundësinë e kryetarit të bashkisë dhe Bashkisë Devoll. Ua dha këtë mundësi të artë qytetarëve të saj, rinisë së saj, për të praktikuar sportet marciale luftarake si taekwondo dhe boks. I mirëpresim që të gjithë, edhe fëmijët nga mosha 4 vjeç e sipër që të ushtrohen në Akademinë e Arteve Marciale në Bilisht. Dua të përmend edhe diçka tjetër, që shumë të rinj nga qyteti i Bilishtit vinin për t'u stërvitur në akademinë që ndodhet në Korçë. Për ta ishte një surprizë shumë e madhe që u bëri kryetari dhe ne si akademi, që tashmë jemi në qytetin e tyre që ata ta kenë më të lehtë për t'u stërvitur”, tha Dorian Potka, trajner i arteve marciale.

Mbështetja e Bashkisë Devoll ka qenë kyçe në realizimin e kësaj nisme, duke e kthyer atë në një projekt konkret në funksion të komunitetit.

Inaugurohet Akademia e Arteve Marciale në Bilisht, një mundësi e

"I urojmë mirëseardhjen dhe një fillim të mbarë për këtë nismë që kemi marrë ne si bashki nëpërmjet Qendrës Kulturore të Fëmijëve, për të zhvilluar në bashkinë tonë një sport të ri që i ka munguar kësaj bashkie dhe këtyre fëmijëve të cilët e ardhurojnë sportin e taekwondo-së. Është një nismë e propozuar nga autori, por bashkia e mbështeti dhe do të bëjë gjithçka mundet për ta mbështetur edhe më tej", ka deklaruar kryebashkiaku Eduard Duro.

Përfaqësues të sportit në nivel rajonal vlerësuan bashkëpunimin mes institucioneve dhe aktorëve sportivë, duke e konsideruar atë një model për t’u ndjekur.

Inaugurohet Akademia e Arteve Marciale në Bilisht, një mundësi e

"Një iniciativë dhe një bashkëpunim i mrekullueshëm që të hapet një derë për sportin. Nuk hapim vetëm një derë për sportin, por për të ardhmen e të rinjve që do t'i bashkohen këtij sporti jo kaq të thjeshtë, e jo vetëm taekwondo, por disa lloje sportesh. Është një bashkëpunim që duhet të marrin shembull të gjithë drejtuesit, jo vetëm lokalë, por dhe qendrorë”, u shpreh Pavlina Evro, presidente e Komitetit Olimpik Rajonal Korçë, kampione atletike.

Hapja e Akademisë së Arteve Marciale në Bilisht pritet të ndikojë pozitivisht jo vetëm në zhvillimin sportiv të të rinjve, por edhe në përfshirjen e tyre në aktivitete të shëndetshme, larg fenomeneve negative.

Me këtë iniciativë, Bilishti i shtohet hartës së qyteteve që po investojnë në sport dhe në të ardhmen e brezit të ri, duke krijuar kushte më të mira për zhvillimin e talenteve dhe promovimin e një stili jetese aktiv./ CNA