E fundit!

14:31 Qyteti im

Në "zemër" të Devollit me kryebashkiakun Duro/ Historia, natyra dhe turizmi i së ardhmes

CNA TV udhëton drejt Devollit, një prej zonave më të veçan...

Përse po shëndoshen njerëzit? Faktorët që ndikojnë

13 Mars 2024, 09:24, Shëndeti CNA

Në kohët e sotme, industria e produkteve shtazore dhe fermerët në shumë raste injektojnë antibiotikë të ndryshëm te kafshët.

Kjo bëhet jo vetëm për të shmangur sëmundjet, por edhe për të nxitur rritjen e tyre të shpejtë. Këto medikamente stimulojnë oreksin dhe kafshët shtojnë shumë në peshë, duke anashkaluar fazat normale të rritjes.

Praktika e injektimit të antibiotikëve nisi të zbatohej në fillim të viteve '50, kur fermerët në botë kuptuan se gjedhët shtonin shumë në peshë pas trajtimit me ilaçe. Edhe pse jo të gjithë fermerët në Shqipëri e përdorin, kjo praktikë nxjerr në pah dy shqetësime shumë të rëndësishme për shëndetin.

Shqetësimi i parë ka të bëjë me rritjen e asaj që njihet si rezistenca ndaj antibiotikëve.

I dyti është se antibiotikët e përdorur te mishi kanë të njëjtin ndikim edhe te njeriu që e ha atë. Sipas studimeve të cilave u referohet AgroWeb.org, antibiotikët tek ushqimi shkatërrojnë florën bakteriale në stomak.

Ato prishin ekuilibrat e mikroorganizmave në sistemin tretës të njeriut. Në këtë mënyrë tretja e ushqimit tjetërsohet dhe bën që njeriu të përthithë më shumë kalori seç duhet.

Faktorë të tjerë të mbipeshës

Ushqimet e shpejta, stili pasiv i të jetuarit e shumë të tjera janë faktorë kontribues në shtimin në peshë të njeriut.

Niveli i antibiotikëve që po përdoret në ushqimin që ne konsumojmë është gjithnjë në rritje. Të dhënat e AgroWeb.org tregojnë se për sa kohë këto antibiotikë nxisin shtimin në peshë te kafshët, mbetjet e tyre te mishi do të kenë të njëjtin ndikim te njeriu.

Cila është zgjidhja?

Autoritetet e shëndetit të shumë vendeve të zhvilluara po u drejtohen industrive përkatëse ngadalësimin e përdorimit të antibiotikëve.

Sipas informacioneve të AgroWeb.org, Kanadaja nga ana tjetër është treguar më drastike duke vënë kufizime të mëdha në sasitë e shitura të antibiotikëve nga veterinerët.

Kjo nismë është e vështirë të aplikohet në mbarë botën për shkak të pushtetit të madh të industrisë farmaceutike dhe asaj të përpunimit të mishit.

Edhe pse janë politikat shtetërore ato që duhet të funksionojnë, zgjidhja qëndron shumë edhe te konsumatori, thonë ekspertët.

Nëse blerësi refuzon të blejë mish të gjedhëve të rritur me antibiotikë, do të krijohet një efekt zinxhir që do të detyrojë industrinë të ndryshojë standardet e prodhimit.

Konsumatori duhet të sigurohet mirë për mishin që blen. Të mos blejë në vendet e tregtimit të papërshtatshëm dhe të zgjedhë mish të certifikuar. Kjo duhet bërë për hir të shëndetit./AgroWeb.org