Nata finale e “Kokofest”/ Triumfon “Karnavalet e Korçës”

5 Shtator 2024, 13:43, Qyteti im CNA

Nata finale e “Kokofest” ka sjellë në skenë shfaqjen “Karnavalet e Korçës” me një kast të artistëve korçarë që kanë sjellë shumë kënaqësi për publikun. Nën regjinë e Erion Isait, dhe interpretimet e shkëlqyera të artistëve shfaqja teatrore që ka në qendër përpjekjet e një çifti aristokratësh korçarë për të martuar vajzën e tyre ka arritur të marrë edhe çmimin shfaqja më e mirë e festivalit.

Prej fillimit të shfaqjes, artistët të veshur me kostumet e tyre të karnavaleve u bënë një me publikun duke kënduar së bashku për të vijuar më tej interpretimin në skenë ku mes shumë personazheve strumbullari i gjithçkaje janë tregtari Nikollaq Jorganxhi, bashkëshortja e rij Olimbia dhe vajza e tyre Afroviti me pretendimet e larta për të gjetur një dhëndër dinjitoz.

Për regjisorin Erion Isai, puna për rikthimin e kësaj shfaqjeje ishte një përgjegjësi e madhe po aq sa kënaqësi.

Nata finale e “Kokofest”/ Triumfon “Karnavalet e

Erion Isai

“Është dyfish përgjegjësi sepse ‘Karnavalet e Korçës’ u rikthyen në shtëpinë e tyre, kjo është skena e tyre, gjuha që artistët flasin. Si duket kjo skenë është mjalti i mjeshtërisë së aktorëve pasi prej vitesh, qysh prej kasteve të filmave shqiptarë, Korça ka pasur gjithmonë një numër më të madh të artistëve në talent dhe në shkëlqim. Uroj që publiku ta vlerësojë me pjesëmarrje në netët e mëpasshme sepse kulmimi i festivalit për ta mbyllur me këtë shfaqje ka qenë një privilegj i mjaftueshëm”.

Surprizë në këtë shfaqje ishte aktori aq i dashur korçar, Arben Dervishi, i cili u rikthye në skenë pas 12 vitesh mungesë. Në rolin e tregtarit Nikollaq Jorganxhi krah Zamira Kitës në rolin e Olimbisë, dhe aktores së re Paola Kodra në rolin e Afrovitit, artistët tregojnë se emocionet për ta kanë qenë të shumta.

Nata finale e “Kokofest”/ Triumfon “Karnavalet e

“Një rikthim 24 karat, në variantin tim, variantin e komedisë që unë e kam pasur shumë qejf. Është një komedi e mrekullueshme e Spiro Çomorës që është luajtur në shumë variante nga shumë aktorë, ndaj ishte edhe emocioni im aq i madh që ndoshta dhe ju e ndiet dhe mbas 12 vitesh rikthehem në skenën e teatrit të Korçës. Ishte një punë e bukur e palodhshme me regjisorin Erion Isai dhe më kryesorja sepse luajta me shoqen time që kam luajtur prej 18 vitesh, Zamira Kita. Ishte ftesa e regjisorit që më solli këtu. Kisha shumë punë, por unë s’mund të lija këtë punë", tha Arben Dervishi.

Nata finale e “Kokofest”/ Triumfon “Karnavalet e

“Kokofesti shkoi mirë, ne kërkesat i kemi edhe për më mirë. Kishim shfaqje shumë të mira, publiku i priti me shumë entuziazëm, publiku u kënaq. Juria mendoj dha çmime të merituara. Shfaqja më e mirë u shpall ‘Karnavalet e Korçës’, ndërkohë që jemi krenarë sepse morëm edhe disa çmime me shfaqjen ‘Vasha Zheleznova’ me regjinë e Enke Fezollarit.

Rikthimi i Arben Dervishit ka qenë shumë emocionues, ne kemi punuar fort dhe ai është ndier i sigurt”, deklaroi Zamira Kita.

Nata finale e “Kokofest”/ Triumfon “Karnavalet e

Për 8 net trupa teatrore nga Vlora, Durrësi, Shkodra, Korça dhe Kosova e Greqia janë ngjitur në skenën e teatrit “Andon Zako Çajupi” për 8 mbrëmje radhazi duke përcjellë emocione dhe humor për publikun.

Juria e përbërë nga personalitete të teatrit dhe kinematografisë shqiptare vlerësuan si shfaqjen më të mirë “Karnavalet e Korçës”, ndërsa çmimin për regjinë më të mirë e mori Fatos Berisha me shfaqjen “Club Albania”. Çmimi i karrierës shkoi për Leka Bungon, ndërsa çmimet për artistët e rinj më të mirë u morën nga Urim Aliaj dhe Ilda Pepi, aktorët joprotagonistë më të mirë Ard Islami dhe Paola Kodra. Sakaq trofeun si aktorët protagonistë më të mirë të këtij KokoFesti e morën aktorët Firmond Morina dhe Zamira Kita./ CNA TV