web counter
LEXO PA REKLAMA!

SHKARKO APP

App Store
Google Play

Nga Elda Zavalani/ Një letër ministres Balluku, Tiranë-Korçë, një ferr larg

25 Gusht 2024, 09:35, Qyteti im CNA
Nga Elda Zavalani/ Një letër ministres Balluku,
Elda Zavalani

Shqetësim qytetar: Ka javë të tëra që rruga Korçë-Tiranë, gjithsej 185 km, bëhet pesë orë e gjysmë me makinë.

Pale të shkosh në aeroport, duhen edhe dy orë të tjera. Problemi më i madh: rrethrrotullimi i Elbasanit dhe një segment me ato pengesat e shpejtësisë që makinat hidhen përpjetë dhe shpejtësia shkon në 0 km në orë.

Më tutje Astiri, i cili është gjithmonë i bllokuar, gjithashtu segmenti Vorë-Aeroport e kështu me radhë.  D.m.th. kërthiza e Shqipërisë, aty ku qarkullojnë shumica e automjeteve të lehta e të rënda, gjithsej 50 km, do 3-4 orë të kalohet.

Zonja ministre e Transportit, si ju zë gjumi? Pse mjekët ngrihen natën dhe i rrinë të sëmurit te koka? Pse mësuesit nxjerrin shkumë në klasë për të shpjeguar diçka të vështirë? Pse policët ndodhen gjithnjë në detyrë, në të mirë e në të keq? Pse punëtorët e pastrimit dalin natën dhe fshijnë? Pse farmacistët janë gjithë ditën në shërbim të njerëzve?

Pra, ndjenja e përgjegjësisë ndaj jetës së komunitetit dhe përmirësimit të saj, duhet të shqetësojë ata që kanë marrë përsipër të punojnë në instancat përkatëse. Prandaj dil një herë në rrugë zonja ministre, bashkë me ca nga stafi i ministrisë suaj, shikoni ç'bëhet dhe na thoni konkretisht si e keni menduar t’i zgjidhni këto ngërçe dhe kur.

Para dy javësh, kisha një franceze me dy djemtë e saj ngjitur në avion. Me shumë ekzaltim, po vinin të bënin një tur nëpër Shqipëri, duke marrë një makinë me qira.

Në heshtje, ia qava hallin shumë. Sigurisht nuk i thashë gjë, po vërtet më erdhi keq, si do lëvizte me këtë gjendje trafiku të tmerrshme...

Ju faleminderit për mirëkuptimin. Presim përgjigje me gojë a me shkrim, si ta keni! Ose më mirë pa llafe fare, po me vepra!/CNA 





Lajmet e fundit nga