LEXO PA REKLAMA!

SHKARKO APP

E fundit!

x

Dritan Hoxha, komisari i policisë, i apasionuar pas motorëve

20 Korrik 2022, 19:52, Qyteti im CNA
Dritan Hoxha, komisari i policisë, i apasionuar pas motorëve
Dritan Hoxha, komisari i policisë

Dritan Hoxha është një nga punonjësit e policisë më të njohur veçanërisht në juglindje, por edhe në qarqe të tjera të Shqipërisë. Momentalisht ai punon në Drejtorinë Vendore të Policisë së Korçës, ndërsa pjesë e uniformave blu të Policisë së Shtetit është prej 20 vitesh. Një karrierë e pasur me shumë pozicione pune sa të bukura aq edhe të vështira për të. Por çfarë është policia për Hoxhën?

“Policia ka nisur si pasion, pasi më pëlqejnë gjërat sfiduese. Studimet e mia i fillova në vitin 1995 në Tiranë, në Akademinë e Policisë, dhe i përfundova në vitin 2002 në Akademinë e Policisë, në Ankara të Turqisë. Në kohën kur kam studiuar në Turqi, kam qenë kapiten i ekipit të notit të akademisë, po ashtu edhe i zhytjes. Madje, për sportin e zhytjes dhe shpëtimit të jetës në ujë, jam vlerësuar dy herë me medalje argjendi. Vitet e studimit janë realisht të paharrueshme, me eksperienca të jashtëzakonshme, me mësimdhënie nga pedagogë të diplomuar në Oxford dhe Harvard dhe me një staf akademik të mirëfilltë, nga të cilët jam vlerësuar me mesataren 8.3 për të gjitha vitet. Prej 20 vitesh tashmë jam pjesë e pandarë e policisë, ku mes këtij profesioni kam shërbyer edhe në Shërbimin e Kontrollit të Brendshëm”.

Dritan Hoxha, komisari i policisë, i apasionuar pas motorëve

Mesa duket, policia nuk është i vetmi pasion që ka Dritani në jetën e tij. Madje, më parë se të realizonte pasionin për policinë, ai i ka kushtuar një pjesë të rëndësishme të jetës së tij, pasionit për motorët. Një pasion, i lindur në 1994 atëherë kur Dritani ishte vetëm 17 vjeç. Pasionin për motorat e ka trashëguar nga babai i tij, pasi ka qenë ai personi që ka mbajtur motor në shtëpi dhe ia ka futur në gjak djalit të tij.

“Babai im ka qenë aviator ushtarak, ka përfunduar shkollën e aviacionit në Moskë, dhe ka shërbyer në Forcat Ajrore deri në vitin 1970, ku si pasojë e një aksidenti në ajër, dëmtoi veshin. Pas asaj, dashurinë për inxhinierinë, ia përkushtoi motorave. Për shkak të vjetërsisë së motorave në atë kohë, kërkonin mirëmbajtje të përditshme, pastrim dhe rregullim, dhe duke parë babain tim edhe mua më hyri në zemër ky lloj pasioni. Fakti që unë jam akoma më i lidhur me motorat është se humba babain tim nga një aksident me motor, e që prej asaj dite unë i jam përkushtuar me shpirt, si një amanet nga babai im.”

Dritan Hoxha, komisari i policisë, i apasionuar pas motorëve

Dritani ka ngritur garazhin ku mban të gjithë motorët, veglat për të riparim, veshje të ndryshme motorësh, skafanda dhe maska të dhuruara nga grupe të ndryshme motoristësh në shenjë mirënjohjeje për ndihmesat e dhëna, por edhe bashkëpunimin mes tyre.

“Garazhin e hapëm rreth 12 vite më parë, së bashku me shokun tim të fëmijërisë Jerin Panoti, që në fakt me profesion është dentist, por është i apasionuar si unë ndaj motorëve. Gjithsej kemi 8 motorë, të markave të ndryshme, të cilët kanë një veçanti specifike të asaj që përfaqësojnë. Të gjithë janë të preferuarit e mi, nuk mundem t’i ndaj pasi ne kujdesemi për ta sikur t’i kishim fëmijë. Ndonëse është një pasion i kushtueshëm, nuk na ka frenuar për ta vazhduar atë. Çdo motor është projekt më vete, fillon me çmontimin deri në detaj, pastrimin dhe restaurimin e çdo pjese të dëmtuar, kërkimin e pjesëve të reja në website të ndryshme dhe më pas, asamblimin e tyre me detaje duke e bërë çdo motor të veçantë nga origjinali që prodhohet në fabrikë.”

Dritan Hoxha, komisari i policisë, i apasionuar pas motorëve

Që një motor të restaurohet totalisht sipas projektit fillestar, kërkon jo më pak se 1 vit kohë. Një vit përkushtimi, lodhje, netë pa gjumë, që rezultati përfundimtar të jetë i duhuri. Normalisht, në pasionin e motorëve nuk mungojnë garat, kryesisht në Greqi me shoqatën e motoristëve të Selanikut.

“Personalisht kam hequr dorë për të garuar, për shkak edhe të moshës pasi garuesit janë deri në 35 vjeç. Në çdo garë të organizuar përfaqësohem me motor Aprilia RSV 4, e cila është një mrekulli inxhinierike italiane. E kemi përpunuar së bashku me dy inxhinierë grekë duke rritur fuqinë motorike nga 141 HP në 200 HP. Motori momentalisht është në testim, duke u bërë gati për garat që do të zhvillohen në shtator në Greqi. Puna e madhe e jona për rritjen e cilësisë dhe fuqisë së këtij motori ka filluar që prej pandemisë dhe shpresoj që të dalë me sukses në shtator.”

Dritan Hoxha, komisari i policisë, i apasionuar pas motorëve

Ndërsa e pyesim Dritanin për zgjedhjen që do bënte mes policisë dhe motorëve ai përgjigjet:

“Nuk i ndaj dot. Janë pasionet e mia të jetës që u jam përkushtuar dhe do të vazhdoj t’u përkushtohem për gjithë jetën.”

Ky pasion i veçantë do të ketë në vazhdimësi krijimin e Shoqatës “Pogradeci Motoclub”, i cili do të ketë objekt përfaqësimin në çdo lloj evenimenti të motoristëve të Pogradecit, që këta të fundit të mos detyrohen të garojnë jashtë shtetit.

Adresa e garazhit : Bulevardi “Dëshmorët e Pojskës", pranë stadiumit, Pogradec./ CNA.al

 

Lajmet e fundit nga