web counter
LEXO PA REKLAMA!

SHKARKO APP

App Store
Google Play

E fundit!

x

“Vendimi i Kushtetueses doli nga zyrat e Ramës”/ Berisha, thirrje qytetarëve: Më 22 dhjetor merrni në dorë fatet tuaja

15 Dhjetor 2025, 12:58, Politikë CNA

“Vendimi i Kushtetueses doli nga zyrat e Ramës”/ Berisha,

Kreu i PD-së, Sali Berisha, në një konferencë për mediat u ka bërë thirrje qytetarëve që më 22 dhjetor të marrin në dorë fatet e tyre dhe të protestojnë për të rrëzuar qeverinë Rama 4.

Lideri i opozitës ka bërë me dije se protestat do të zgjasin deri në krijimin e një qeverie teknike.

Sa i përket vendimit të Gjykatës Kushtetuese për çështjen "Balluku", sipas Berishës, ky vendim ka dalë nga zyrat e Ramës.

“Vendimi i dalë nga zyrat e Edi Ramës, dhe i firmosur nga gjykatës të papërgjegjshëm, mbyll çdo shteg, çdo rrugë, çdo mundësi për luftën kundër korrupsionit, mbrojtjen me ligj të pasurive publike dhe të taksave të qytetarëve shqiptarë.

Edi Rama kreu aktin më të pashembullt në historinë e një shteti për të mbrojtur paratë e vjedhura dhe të ndara së bashku me Lubi Ballukun në tunelin e Llogarasë, dhe jo vetëm.

Çdo përpjekje për të luftuar korrupsionin nga persona me imunitet, bëhet zero. Kurrë Shqipëria në ekzistencën e saj nuk ka marrë një goditje kaq të rëndë në mbrojtjen e vjedhjes së qytetarëve shqiptarë, kurrë.

Që nga themelimi i shtetit shqiptar gjer sot, vendimi i dalë nga zyrat e Edi Ramës dhe i certifikuar nga gjykatës të papërgjegjshëm të Gjykatës Kushtetuese, rrëzon përfundimisht shtetin ligjor dhe garanton vjedhjen e hapur dhe publike të parave dhe pasurive të qytetarëve shqiptarë, shndërrimin e kësaj vjedhje, të këtyre shumave në vota dhe të votës në krim.

Ai raport që unë e kam denoncuar para jush vite e vite, tani ai raport ka marrë mburojën më të fuqishme nga narkogjykata, nga narkoshteti, nga Edi Rama me certifikimin e vendimit të tij në gjykatë.

Ndaj dhe shpresa e vetme, rruga e vetme është që qytetarët shqiptarë të marrin në dorë fatin e tyre, votën e tyre, të ardhmen e tyre.

Dhe kjo ka vetëm një rrugë, protestën, protestën dhe vetëm protestën.

22 dhjetori është një ditë në të cilën çdo shqiptar, pa dallim nga bindjet partiake, mund të dëshmojë guximin, vendosmërinë e tij në denoncimin, demaskimin e mbrojtjes publike që Edi Rama u bëri vjedhjeve të tij dhe Lubi Ballukut, në përpjekjen për të vendosur qeveri teknike dhe zgjedhjet e ardhshme", tha Berisha./ CNA





Lajmet e fundit nga