Veliaj u ndërsen “kolegëve” avokatët e tij

27 Dhjetor 2024, 15:42, Politikë CNA

Veliaj u ndërsen “kolegëve” avokatët e tij

Fotomontazh - Kryebashkiaku i Tiranës, Erion Veliaj

Kryebashkiaku i Tiranës, Erion Veliaj, nëpërmjet avokatëve të tij ka reaguar pas thirrjes dje në SPAK apo edhe njoftimit publik të bërë nga Struktura e Posaçme Hetimore sot në mesditë, ku jepeshin 4 akuza mjaft të rënda për Veliajn.

Në momentet kur pritej dorëheqja e tij për të treguar një akt qytetar, Erion Veliaj ka ndërsyer avokatët e tij kundër “kolegëve” të SPAK-ut.

Në fakt, duken avokatë anonimë sepse nuk kanë emrat dhe gjithçka është publikuar në mediat e Veliajt.

Avokatët anonimë nxjerrin disa pika me pretendime, por në fund e pranojnë që Veliaj është një person nën hetim, që ka fakte dhe prova dhe tani kërkojnë të gjejnë teknikalitete dhe të kapen pas procedurave.

Kryebashkiaku i Tiranës, Erion Veliaj

Megjithatë, thelbi është një dhe vetëm një. Erion Veliaj ka 4 akuza dhe janë gjetur shumë fakte dhe prova, të cilat duket se e kanë tronditur. Edhe kush nuk ka informacione, e kupton mjaft mirë se çfarë halli ka lali.

Argumentet e avokatëve anonimë:

Hetim keqdashës, i qëllimshëm dhe në kundërshtim me ligjin

1. Nisja e procesit hetimor pa dyshim të arsyeshëm

• Procesi hetimor është iniciuar mbi bazën e një kallëzimi anonim dhe të dhënave të supozuara (fiktive), pa u paraqitur prova ose indicie të mjaftueshme që të krijojnë dyshimin e arsyeshëm ligjor.

• Nuk kuptohet qartë vepra penale për të cilën është kallëzuar ose dyshohet EV.

• Nëse kallëzimi është bërë konkretisht në emër të EV, prokurori kishte detyrimin ligjor ta regjistronte emrin e tij në regjistrin e veprave penale. Nga ai moment duhej të fillonte edhe llogaritja e afatit gjashtëmujor të hetimit.

SPAK konfirmon gazetarin: Janë ngritur 4 akuza për Erion Veliajn
27 Dhjetor, 13:31
Veliaj u thirr në SPAK/ Prokuroria reagon publikisht: Akuza për disa vepra penale
27 Dhjetor, 12:50

2. Fshehja e faktit të vendosjes në hetim të EV dhe familjes

• EV dhe familja e tij janë vënë në hetim faktik që në muajin mars 2024, por ky fakt është mbajtur i fshehtë nga Prokuroria, me pretendimin se hetimi po bëhej “për veprën penale” dhe jo “kundër personit”.

• Megjithatë, veprimet hetimore të kryera kanë qenë të përqendruara realisht te persona konkretë, duke krijuar situatën e një hetimi substantivisht individual ndaj EV (dhe të tjerëve), pa e njoftuar zyrtarisht këtë status.

3. Kërkesa për kontrolle dhe sekuestrimin e telefonave pa mandat

• Prokuroria ka kërkuar kontrolle dhe ka kryer sekuestrimin e telefonave, në mungesë të një urdhri të posaçëm gjyqësor (mandati), duke shkelur procedurën ligjore në fuqi.

• Telefoni është marrë jo vetëm pa vendim gjykate (madje gjykata nuk e ka pranuar kërkesën e prokurorit), por edhe pa pëlqimin e përdoruesit. Ai nuk është sekuestruar si një objekt me të cilin është kryer një vepër penale, por me qëllimin për të kërkuar të dhëna që mund të përdoreshin në një vepër të supozuar. Me fjalë të tjera, ka qenë një sekuestrim në kërkim të veprës, jo i provës për një vepër penale të përcaktuar.

4. Intimidimi dhe dhuna agresive ndaj të thirrurve si “persona në dijeni”

• Personat e thirrur me cilësimin “persona në dijeni” janë përballur me qasje kërcënuese dhe dhunë të stilit “sigurims”, duke u detyruar përmes presioneve dhe frikësimit të dëshmojnë kundër vetes.

SPAK

5. Keqpërdorimi i cilësimit “persona në dijeni” për EV dhe AX

• Edhe pse EV dhe AX janë de facto nën hetim, janë thirrur nga Prokuroria si “persona në dijeni” me qëllim që t’i detyrojnë të dëshmojnë kundër vetes ose anëtarëve të familjes, duke i privuar kështu nga e drejta e detyrueshme për avokat mbrojtës.

6. Tejkalimi i afateve hetimore

• Afatet hetimore janë tejkaluar. Sipas ligjit, periudha gjashtëmujore e hetimit duhet të fillojë që në momentin kur ndaj EV dhe AX kanë nisur veprimet hetimore specifike, e jo më vonë.

7. “Fishing expedition”

• Hetimi duket i qëllimtë ndaj një individi, jo për një vepër penale të caktuar, por për vetë personin (EV), me synimin për ta kapur medoemos në një shkelje, qoftë penale apo administrative.

8. Dalja në media e informacioneve mbi hetimin

• Informacione të ndryshme lidhur me hetimin janë transmetuar në media, duke krijuar hapësirë për interpretime keqdashëse dhe denigruese ndaj figurës së kryetarit të bashkisë. Kjo ka nxitur një perceptim publik të fajësisë së EV, duke dëmtuar parimin e prezumimit të pafajësisë dhe duke cenuar barazinë e palëve në proces.

• Një veprim i tillë mund të përbëjë shkelje të rënda, qoftë përmes dashjes apo neglizhencës, pasi përbën keqadministrim të hetimit dhe dëmton integritetin e procedurës penale./ CNA