E fundit!

08:09 Kronika

E rëndë në Maliq/ Një person vret efektivin e policisë, plagos 1 tjetër

Një ngjarje e rëndë është shënuar këtë të enjte në Maliq, ...

"Uroj që vitin e ardhshëm të mbyllet perdja e këtij teatri absurd të drejtësisë"/ Rama drejt Hagës, takon Thaçin

18 Dhjetor 2025, 09:45, Politikë CNA

Kryeministri Edi Rama, me anë të një videoje në rrjetet sociale, ka reaguar për procesin në Gjykatën e Hagës ku po gjykohen ish-luftëtarët e UÇK-së, Hashim Thaçi, Kadri Veseli, Jakup Krasniqi dhe Rexhep Selimi. Rama tregoi se ishte duke shkuar drejt Hagës për të takuar ish-presidentin Thaçi.

Në reagimin e bërë Rama uroi që vitin e ardhshëm, me mbarimin e atyre që ai i quajti dëshmitarë qesharakë dhe me dëshmitë serioze të mbrojtjes të mbyllet dhe procesi hetimor.

Proces të cilin Rama e cilësoi si një teatër absurd të drejtësisë europiane. Kryeministri tha se i vetmi faj që kanë bërë ish-luftëtarët e UÇK-së është rebelimi ndaj një regjimi dhe marrja e armëve për të mbrojtur lirinë e tyre.

Kjo, tha Rama, është një e vërtetë që nuk e tund dot askush, aq më pak çekiçi i drejtësisë europiane, për të cilën Rama tha se po lë kokrrën e namit.

Më tej, Rama tha se në këtë proces gjyqësor ka vetëm një të drejtë, që është e drejta e heronjve të Kosovës e bekuar me gjakun e tyre e me dhimbjet e grave dhe vajzave të përdhunuara dhe sakatuara në një nga periudhat më të errëta të Europës.

“Ende pa u dënuar, një president i zgjedhur nga populli së bashku me 3 bashkëluftëtarë që kanë mbuluar detyra nga më të rëndësishmet mbahen mbyllur, të izoluar. Tani që ka mbaruar dhe ekspozeja e pseudoprovave të akuzës dhe parada e dëshmitarëve qesharakë si dhe kanë mbaruar dëshmitë tejet serioze të dëshmitarëve të mbrojtjes pritet vendimi. Uroj që viti i ardhshëm të jetë viti i mbylljes së perdes së këtij teatri absurd të drejtësisë dhe daljes nga izolimi brutal i Thaçit dhe bashkëluftëtarëve të tij. Uroj që vendet, të cilat sponsorizojnë këtë gjykatë të reflektojnë për nivelin shumë nën vijat e kuqe të një drejtësie demokratike të gjithë kësaj që po ndodh prej vitesh me njerëzit që të vetmin faj që kanë është rebelimi ndaj një regjimi satrap dhe morën armët për të mbrojtur lirinë dhe të drejtën e tyre të pamohueshme për të jetuar si njerëz të barabartë dhe jo si një grup social i përdhunuar për shkak të etnisë së vet në një diktaturë. Këtë të vërtetë nuk e tund dot askush e lëre më pastaj një çekiç i një drejtësie ndërkombëtare që në këtë rast ka lënë kokrrën e namit. Dua shumë të besoj se në fund e drejta do të fitojë. Këtu ka vetëm një të drejtë, që është e drejta e bekuar përjetësisht me gjakun e heronjve, me dhimbjet e patregueshme të nënave, grave e vajzave të përdhunuara e të sakatuara gjatë një periudhe nga më të zymtat për vetë Europën në zemër të Europës”, tha Rama.