Tensionet në Këshillin Bashkiak/ Dorian Teliti për CNA TV: Veliaj u mësua ta ketë sallën pa opozitë

1 Shkurt 2024, 19:56, Politikë CNA

Tensionet në Këshillin Bashkiak/ Dorian Teliti për CNA TV: Veliaj

Nënkryetari i Këshillit Bashkiak demokrat, Dorian Teliti

Mbledhja e fundit e Këshillit Bashkiak të Kryeqytetit u mbyll në një kohë rekord, për vetëm 4 minuta, ndërsa u shoqërua me tensione të shumta midis këshilltarëve të opozitës dhe atyre të mazhorancës.

Nënkryetari i Këshillit Bashkiak demokrat, Dorian Teliti, në një intervistë për CNA TV është shprehur se këto janë manovra të socialistëve, për të ndaluar oponencën.

"Për të protestuar jemi atje, nuk jemi ne për të qeverisur. Për të qeverisur Tiranën janë ata. Ne jemi për të bërë opozitë për punën e tyre. Veliaj nuk duronte dot më mos kishte sallën nën kontroll. Ishte mësuar 4 vite ta kishte sallën bosh. Opozitë fasadë ne nuk jemi. Jemi atje për të ngritur hallet dhe shqetësimet e njerëzve."

Teliti foli edhe për arrestimet në bashkinë e Tiranës, duke thënë se kryebashkiaku Erion Veliaj duhet të japë llogari për aferën e inceneratorëve.

"Merren 12 milionë euro për të paguar inceneratorët përsëri këtë vit. Inceneratori nuk ekziston, e ka pranuar vetë Kryetari i Bashksië. Pse m'i merr paratë mua për inceneratorin? Tarifa e vendosur prej 29 eurosh për ton përfshin edhe depozitimin edhe incenerimin. Në muajin dhjetor, 23 opozitarë, nga 61 kërkuan mbledhjen urgjente të Këshillit Bashkiak. U zhvillua gjë mbledhja? Jo! Ne kërkonim diskutime mbi çështjen e inceneratorit, pasi ishte arrestuar drejtori i punëve publike."

Demokrati renditi edhe disa prej problematikave kryesore që shqetësojnë qytetarët e Tiranës, aktualisht, si disa prej arsyeve pse opozita kërkon që Bashkia e Tiranës të mbajë përgjegjësi.

"Për çfarë nuk donte të diskutonte kryetari i bashkisë? Që do paguajmë taksën e pronës 53% më shumë se në 2023? Për faktin se 2/3 e buxhetit total të bashkisë shkon për paga dhe shpenzime operative? Për rrugët e munguara? Për faktin se bie 15 minuta shi dhe përmbytet gjithë Tirana? Për transportin publik nuk do të diskutojë kryetari i bashkisë? Kishte plot akte të cilat nuk duhet të kalonin. Duhet të hidheshin poshtë se kishin kaluar pa procedurë të konsultimit publik, në kundërshtim me interesin publik. Binin ndesh me interesat tona ekonomike, monetare. Zona të Tiranës nuk kanë asnjë kopësht apo çerdhe publike."

Ndërkaq, Teliti tha se Partia Demokratike në ditët në vijim do të mbledhë këshillin Kombëtar, për të diskutuar vazhdimësinë e aksionit opozitar./ CNA