“Tashmë i ka kapur frika”/ Teliti: Faturat prej 9 milionë eurosh për DHL-në mbahen nga KQZ-ja

3 Shtator 2025, 10:41, Politikë CNA

“Tashmë i ka kapur frika”/ Teliti: Faturat prej 9 milionë

Këshilltari për Çështjet Ekonomike në Partinë Demokratike, Dorjan Teliti, komentoi sot lidhur me zhvillimet e ditëve të fundit, mbi faturën dhe pagesën që KQZ duhet t’i bëjë kompanisë postare DHL që realizoi shpërndarjen e fletëvotimeve për diasporën në zgjedhjet e 11 majit.

Në një intervistë në "Syri TV", Teliti ngriti pretendimin se nëse është kryer puna e duhur nga KQZ dhe DHL më 11 maj, atëherë nuk ka përse të mos jepen 9 milionë eurosh për këtë shërbim.

Teliti shtoi se vonesa mund të vijë prej mbajtjes së faturave prej muash nga komisioneri Celibashi.

“Kjo vërteton diçka. Atë që është problematikë e 3 dekadave tranzicion. Që kur vjen puna në qëndrimet politike që nuk është se kanë një vlerë ligjore, të gjithë bëjnë sipas porosisë. Dhe porosia cila ishte? Të njihen zgjedhjet...dhe Celibashi e kreu shumë mirë.

U njohën zgjedhjet, i zyrtarizoi. Kur vjen puna pastaj te përgjegjësia ligjore, e cila është zbatimi i një kontrate që edhe sipas legjislacionit shqiptar ka të njëjtën vlefshmëri me ligjin dhe zbatimin e tij, aty pas dhe njerëzit e dinë shumë mirë, duhet të jemi të kujdesshëm. Sepse sot ne me të vërtetë mund ta firmosim këtë kontratë, por nesër vjen KLSH, vjen auditi i radhës, ia solli një ekspertim financiar, por nesër mund të jetë edhe një komision hetimor parlamentar, i cili do bëjë verifikimin e të gjithë ecurisë të procesit të votës së diasporës, ku pjesë kyçe e saj do të jetë patjetër edhe zbatimi i kontratës së saj të firmosur nga vetë KQZ me operatorin konkret, DHL, për çfarë u përket gjithë detyrimeve që kishte dhe privilegji final që është paraja.

I duan 9 milionë euro? Le t'i marrin nëse kanë bërë punën. A është KQZ ajo që tha se vota e diasporës është vota e shkëlqyer, është vota e drejtë, është votë e lexuar siç duhej, ishte votë e shkuar siç duhet, e dorëzuar siç duhet, e marrë në dorëzim siç duhet, e ardhur në KQZ siç duhet, e numëruar siç duhet. A u thanë këto gjëra? Të firmosen, pse nuk firmosen sot?

Ç'do të thotë të mos firmosësh detyrimin financiar, pagesën e një procesi. Ama, kur ti ke frikën, kur ti ke ndrojtje se ai proces nuk është i rregullt, por ti thjesht ke bërë justifikim politik, por e di shumë mirë që në aspektin ligjor ka shkelje nga më të ndryshmet, aty pastaj frika hyn. Dhe frika tashmë i ka kapur, edhe KQZ dhe kryekomisionerin dhe ekipin e tij të cilët mbakan prej muajsh fatura të ardhura nga operatori DHL”,-tha Teliti./CNA