“Stefano Boeri, miku i Ramës”/ PD: Të hetohen projektet e tij në Shqipëri

10 Gusht 2025, 11:00, Politikë CNA

“Stefano Boeri, miku i Ramës”/ PD: Të hetohen projektet e

Zëdhënësja për Antikorrupsionin në PD, Genta Vangjeli përmes një deklarate për mediat ka kërkuar të hetohen menjëherë të gjitha projektet e arkitektit italian Stefano Boeri në Shqipëri, duke e cilësuar si mikun e Ramës dhe duke nënvizuar se është nën hetim në Itali për afera korruptive të lidhura me zgjerimin e pakontrolluar të ndërtimeve.

Sipas Vangjelit, të gjitha projektet e tij ndajnë të njëjtën filozofi, përfitimin e pushtetit dhe oligarkëve, ndërsa qytetari i thjeshtë mbetet i përjashtuar nga vendimmarrja dhe përfitimi.

Ajo thekson se ndërkohë që Stefano Boeri përballet me drejtësinë italiane, qyteti i Tiranës përballet me pasojat e një modeli urban të ndërtuar mbi korrupsion, mungesë transparence dhe marrëveshje klienteliste.

“Arkitekti italian Stefano Boeri, miku personal i Kryeministrit Edi Rama, me biznes të zyrtarizuar në zemër të Bllokut në Tiranë, aktualisht është nën hetim në Itali për afera korruptive të lidhura me ‘zgjerim të pakontrolluar ndërtimi’.

Në Shqipëri, vizioni urban i tij nuk lidhet aspak me nevojat e komunitetit, por me një model zhvillimi të diktuar nga interesat klienteliste të Ramës, duke anashkaluar konsultimin publik dhe pa asnjë ndjeshmëri ndaj identitetit historik të qytetit.

Ndërkohë që Tirana vuan nga mungesa e hapësirave publike, gjelbërimit, transporti publik si dhe shërbime të tjera bazë për qytetarët, Boeri hartoi projekte të cilat shërbejnë vetëm për zbukurimin e fasadës së një pushteti të korruptuar që nuk ka asnjë lidhje me banorët e thjeshtë.

E konkretisht projektet që mbajnë emrin e tij janë:

‘Vertical Forest Tirana’

‘Tirana Riverside’

‘Tirana 2030

‘Kubi i Bllokut’

‘Blloku West’

‘Pylli Orbital 030’ , etj …

Të gjitha këto projekte ndajnë të njëjtën filozofi: përfitimi i pushtetit dhe oligarkëve, ndërsa qytetari i thjeshtë mbetet i përjashtuar nga vendimmarrja dhe përfitimi.

Diferenca qëndron në faktin se ndërsa në Itali drejtësia funksionon dhe nga hetimet nuk përjashtohet askush i dyshuar si shkelës i ligjit, në Shqipëri miqtë e KM përjashtohen nga hetimet pavarësisht denoncimeve të vazhdueshme nga opozita dhe Partia Demokratike për ndërtime pa kriter, pastrim parash dhe abuzime me planifikimin urban.Sot, ndërkohë që Stefano Boeri përballet me drejtësinë italiane, qyteti i Tiranës përballet me pasojat e një modeli urban të ndërtuar mbi korrupsion, mungesë transparence dhe marrëveshje klienteliste.

Partia Demokratike insiston në kërkesën e saj për hetim të menjëhershëm të të gjitha këtyre projekteve në Shqipëri dhe sjelljen e të gjithë përgjegjësve përpara drejtësisë.

E ardhmja e Shqipërisë nuk mund të ndërtohet mbi betonin e pabarazisë, propagandës dhe shpërdorimit të pushtetit”, ka deklaruar Vangjeli./ CNA