web counter
LEXO PA REKLAMA!

SHKARKO APP

App Store
Google Play

Fondet e IPARD/ Panariti: Ka abuzim nga autoritetet shqiptare me 70%, bujqësia në pikiatë

7 Gusht 2025, 19:17, Politikë CNA

Fondet e IPARD/ Panariti: Ka abuzim nga autoritetet shqiptare me 70%,

Ish-ministri i Bujqësisë, Edmond Panariti deklaroi sot se autoritetet shqiptare kanë abuzuar në shkallë të madhe me fondet e BE-së.

Në një intervistë në ‘Syri Tv’, Panariti u shpreh se ka arritur në 70 % shkalla e abuzimit nga fondet e BE-së për Ballkanin Perëndimor në rastin e Shqipërisë.

Panariti shprehu shqetësimin se kjo situatë sjell një dëm të madh për fermerët shqiptarë.

“Burimi thelbësor i financimit të bujqësisë janë fondet në formë granti, kryesisht nga BE, dhe ata merren nga vendet që janë në proces integrimi. Serbia merr çdo vit mbi 285 mln euro, ne kemi tashmë 2 vite që s’përfitojmë 112 mln euro që na takojnë. Edhe për 2 vitet e ardhshme mund të mos kemi nga fondet e BE. Bujqësia s’ka rrugë tjetër veçse të shkojë në një pikiatë të frikshme dhe kjo duket nga tkurrja e prodhimit vendas.

Nga investigimet paraprake të zyrës kundër korrupsionit në BE, OLAF, mendohet se janë 35 mln euro që janë të abuzuar nga autoritetet shqiptare, dhe janë 70% të fondeve të alokuara për vendet e BP, të abuzuara që vijnë vetëm nga Shqipëria. Mendoni se sa e madhe është shkalla e abuzimit nga Shqipëria. 70 % e abuzimit vetëm me Shqipërinë. Ndaj BE ka ndërprerë fondet për vendin tonë dhe është dëm për fermerët shqiptarë.

Kreditimi i bujqësisë me fonde sovrane, me garancinë e bankave të nivelit të dytë për bujqësinë nuk është zgjidhje. Kjo nuk ka funksionuar, dhe është për të larguar vëmendjen, një shashkë nga drama e vërtetë për grantet dhe paratë e dhuruara nga BE për Shqipërinë. Bujqësia në BE nuk financohet me kreditim. Evropa është njëtrajtësisht e populluar në territorin e saj, kemi një popullim uniform në të gjithë territorin. Mbajtja e popullsisë në fshat dhe bujqësisë është element qendror.

Zbrazja e Shqipërisë rurale është e lidhur me degradimin e bujqësisë dhe mosmbështetjen e sektorit. Apo dhe mbështetjen e biznesit për prodhimin bujqësor. Shqipëria rurale është shkretuar. Dominohet nga mosha e 3 që s’është aktive. Hapësira rurale edhe po privohet nga aktiviteti prodhues dhe ekonomik. Oferta me prodhimin vendas është tkurrur në mënyrë të skajshme, është rrudhur oferta e prodhimit vendas, edhe pse ka kërkesë s’ka prodhim. Çmimet janë të lartë se mbahen nga monopolet. Është situatë që dëmton bujqësinë dhe Shqipërinë dhe e çon në degradim. Prodhimi kombëtar duhet të jetë shumë i domosdoshëm. 70% të nevojave duhet të krijohen nga prodhimi vendas, gjë që nuk ndodh”,-tha Panariti./CNA





Lajmet e fundit nga