web counter
LEXO PA REKLAMA!

SHKARKO APP

App Store
Google Play

I burgosuri ndërroi jetë në IEVP "313"/ Berisha: Krim shtetëror, OKB dhe KiE të hetojnë

8 Gusht 2025, 20:37, Politikë CNA

I burgosuri ndërroi jetë në IEVP "313"/ Berisha: Krim

Kryetari i Partisë Demokratike, Sali Berisha përmes një postimi në rrjetet sociale ka reaguar për ngjarjen e rëndë në paraburgimin e “313” në kryeqytet, ku një nga të burgosurit ndërroi jetë si pasojë e arrestit kardiak.

Kryedemokrati Sali Berisha bën fajtorë zyrtarët e IEVP “Jordan Misja” për fatalitetin e Besnik Koçiut, duke cituar raportin e Komitetit Shqiptar të Helsinkit publikuar një ditë më parë për këtë ngjarje, ku theksohej se shkak u bë neglizhenca dhe mosvizita për rreth 9 orë nga mjekët edhe pse i ndjeri kishte referuar komplikacionet shëndetësore.

Berisha shprehet se i burgosuri ndërroi jetë për shkak të neglizhencës së stafit të “313” dhe e konsideron atë si krim shtetëror.

 

"Besnik Koçiu vdiq brenda disa ditësh në qelinë e zezë në rrethana tejet të dyshimta. Seriali i vdekjeve të burgosurve në qelitë e narkoshtetit, tipar mizor i narkoburgjeve të Ramaduros!

Të dashur miq. Viktima e radhës e terrorit psikologjik por edhe fizik ndaj qytetarëve që ushtrohet në qelitë e ferrit të narkodiktaturës është Besnik Koçiu, një i paraburgosur 57-vjeçar që ndërroi jetë më 24 korrik 2025 në rrethana krejtësisht të paqarta në Institutin e Ekzekutimit të Vendimeve Penale (IEVP) “Jordan Misja”, vetëm tetë ditë pas futjes në paraburgim për veprën penale të plagosjes pa dashje. Sipas mediave  i plagosuri nuk kishte ngritur padi kunder te ndjerit. Komiteti Shqiptar i Helsinkit ka reaguar sot dhe ngre pikëpyetje lidhur me rastin e Koçiut, për sa i përket trajtimit mjekësor të personave të privuar nga liria. Besnik Koçiu, informon ky Komitet, ishte pranuar në IEVP më 16 korrik dhe që në momentin e parë kishte raportuar diagnoza të rënda dhe të njohura mjekësisht si: diabet tip 2 (nën insulinë), hipertension i avancuar, dislipidemi dhe një goditje në tru e kaluar vetëm gjashtë muaj më parë.

Pavarësisht këtyre kushteve, ai nuk u dërgua në një strukturë spitalore, por u mbajt në kushte paraburgimi të zakonshme. Pra faktikisht, kriminelë me uniformë në burgje, direkt ose indirekt, ndihmuan në vdekjen e tij. Duke shprehur ngushëllimet më të ndjera familjes, deklaroj se në këtë dramë njerëzore jemi para një vrasjeje shtetërore të radhës në qelitë e zeza, me implikim të qartë, veprim apo mosveprim i narkopersonelit të burgjeve të narkodiktaturës.

Duke dënuar me forcën më të madhe serialin e vdekjeve në qelitë e burgjeve të narkoshtetit të Ramaduros, ju bëj thirrje Komisionit të të Drejtave të Njeriut pranë OKB, Komisionit Kundër Torturës pranë Këshillit të Europës të ndërmarrin një hetim të gjerë e të thelluar mbi kushtet infernale në burgjet dhe qelitë e komisariateve të narkopolicisë së Shqipërisë, sjelljet shtazore të zyrtarëve me uniformë me të burgosurit dhe të ndaluarit në këto burgje dhe qeli të vdekjes", shkruan Berisha.

 

Ngjarja ndodhi më 24 korrik 2025. Besnik Koçiu ishte arrestuar në fillim të korrikut për plagosjen pa dashje të një personi në zonën e Valiasit në Tiranë dhe armëmbajtje pa leje./CNA

 





Lajmet e fundit nga