Skandali “Klea Rama”/ PL: Ministria e Arsimit urdhëroi zbatimin e projektit pa bërë verifikime

10 Gusht 2024, 14:20, Politikë CNA

Skandali “Klea Rama”/ PL: Ministria e Arsimit urdhëroi zbatimin

Selia e Partisë së Lirisë

Zv.presidentja e Partisë së Lirisë, Erisa Xhixho, në një deklaratë për mediat tha se Ministria e Arsimit dhe Sportit vijon të heshtë për skandalin e projektit fantazmë për bursat në Shtetet e Bashkuara të Amerikës "Let’s talk together about US 2024".

Sipas saj, projekti është ngritur me urdhër të drejtuesve të Ministrisë së Arsimit, ndërsa këta të fundit kanë lënë në mëshirë të fatit nxënësit që shpresonin të përfitonin bursat.

“Skandali Klea Rama është prova e radhës që tregon se sa e rëndë është gjendja e funksionimit të sistemit arsimor në Shqipëri. Ky skandal tregon mungesën totale të përgjegjshmërisë nga ministrja dhe zv.ministrja e Arsimit, që kanë urdhëruar gjithe zbatimin e këtij projekti pa asnjë verifikim paraprak, duke qenë bashkëfajtore në këtë skemë mashtrimi.

Nën mbikëqyrjen e Ministrisë së Arsimit, ky projekt u shtri në 68 gjimnaze të vendit, dhe ka angazhuar qindra mësues e koordinatorë brenda dhe jashtë orarit mësimor, duke treguar edhe njëherë se sa e lehtë është të vësh në rresht çdo punonjës të administratës shtetërore, duke përdorur mbiemrin e kryeministrit Rama.

Mjafton të përmendet emri Rama dhe një ministri e tërë vihet në lëvizje nga drejtuesit më të lartë e deri te mësuesi më i thjeshtë, në çfarëdo momenti të ditës. Ngrihen komisione, jepen certifikata dhe hartohen raporte, të gjitha me firmat dhe vulat e ministrisë.

Zv.presidentja e Partisë së Lirisë, Erisa Xhixho

Skandali që po përpiqen ta kufizojnë tek emri Klea Rama është në shkelje të hapur të urdhrit të MAS nr. 634, datë 25.10.2022, ‘Për ngritjen e grupit të punës për shqyrtimin dhe vlerësimin e projekteve të organizatave/shoqatave joqeveritare, dhe individëve që kërkojnë bashkëpunim me Ministrinë e Arsimit dhe Sportit në fushën e arsimit parauniversitar’. Gjë që nuk ka ndodhur me skemën e mashtrimit të Klea Ramës.

Vetë Ministria e Arsimit në fakt, ka dhënë urdhër për zbatimin e kësaj skeme mashtrimi, pa asnjë verifikim paraprak, duke u kthyer në bashkëdrejtuese të saj, dhe kjo nuk mund të fshihet me asnjë heshtje.

Qindra mësues kanë punuar me qindra orë në një vit pa u paguar, pasi janë urdhëruar nga Ministria ta bëjnë këtë punë, mijëra të rinj nga ana tjetër janë zhgënjyer, pasi i kanë besuar këtij projekti, duke e parë si një mundësi reale për të ardhmen e tyre.

Ministria e Arsimit, e cila nuk mban përgjegjësi për dështimin ku e ka zhytur arsimin, nuk ka ende asnjë përgjigje për nxënësit, për prindërit, për mësuesit, që edhe pse u angazhuan me detyrim në këtë projekt, tani janë nën presion për të heshtur, sepse kërcënohen me vendin e punës”, theksoi ajo.

“Let’s talk together about US 2024”, ishte një projekt që ofronte bursa studimi falas për në SHBA, një skemë mashtrimi që çoi në pranga një 20-vjeçar nga Devolli, i cili kishte krijuar identitet të rremë duke u hequr si Klea Rama, mbesa e kryeministrit shqiptar dhe mundi të depërtonte në strukturën e Ministrisë së Arsimit, pa u takuar asnjëherë me asnjë zyrtarë./ CNA