E fundit!

22:00 Aktualitet

VIDEO/ Ndryshim drastik i motit në Vlorë, stuhia përfshin qytetin bregdetar

Qyteti i Vlorës është përfshirë mbrëmjen e sotme nga një s...

"Situata është dinamike për shkak edhe të fronteve"/ Balluku, takim për kushtet meteorologjike

17 Nëntor 2025, 12:33, Politikë CNA

"Situata është dinamike për shkak edhe të

Zëvendëskryeministrja Belinda Balluku në një deklaratë për mediat ka folur për situatën nga reshjet në vend. Balluku deklaroi se në këtë moment është shumë i rëndësishëm bashkëveprimi i të gjitha strukturave duke nisur nga Ministria e Bujqësisë apo Emergjencat Civile.

Më tej, Balluku bëri me dije se janë njoftuar të gjitha ndërmarrjet e infrastrukturës kritike.

Zëvendëskryeministrja tha se është shumë e rëndësishme dhënia e informacionit në kohë reale për kushtet atmosferike.

Balluku bëri me dije se do të ketë takime të vazhdueshme në ditët në vijim me institucionet përgjegjëse.

“Sigurisht, në këtë moment është shumë i rëndësishëm bashkërendimi i të gjitha strukturave, si i Emergjencave Civile, ashtu edhe i Ministrisë së Bujqësisë dhe Zhvillimit Rural. Nga ana tjetër, për sa u përket të gjitha ndërmarrjeve të infrastrukturës kritike janë të njoftuara duke nisur siç thamë nga Korporata Elektroenergjetike Shqiptare, më pas tek OSHEE-ja, Autoriteti Rrugor Shqiptar dhe të gjitha ndërmarrjet e tjera, të cilat kryejnë shërbime për të kontrolluar situatën.

Është e rëndësishme që të ketë një shkëmbim informacioni edhe për sa i përket pjesës së dinamikës që ka situata e kushteve atmosferike, pasi kemi parë që ka pasur dy informacione që kanë ndryshuar, ndërkohë nga mbrëmë në darkë, ku kemi nisur të marrim informacionet e para nga satelitët, sot në mëngjes ka disa ndryshime, pra situata është dinamike për shkak edhe të fronteve të lëvizshme të korridoreve të erës në lartësi.

Për këtë arsye duhet që të ketë një koordinim edhe nga të dhënat që vijnë nga Aviacioni Civil, edhe nga të dhënat që vijnë nga satelitët që përdor KESH-i për të kontrolluar kaskadën, sigurisht me të gjithë informacionet që u vjen nga IGJEUM, apo edhe nga vetë Agjencia Kombëtare e Mbrojtjes Civile.

Shumë e rëndësishme të theksohet që ne do të kemi takime të vazhdueshme gjatë dy ditëve të ardhshme, por duhet që t'i bëjmë thirrje herë pas here edhe përmes kryetarëve të bashkive të gjithë qytetarëve që jetojnë në zonat tradicionalisht të prekura nga përmbytjet, siç u përmend rasti i Fushës së Shkodrës apo të Lezhës, apo edhe zonat që janë afër Vjosës, siç është rasti i Fierit apo i Vlorës, që pavarësisht nëse reshjet aty nuk parashikohen të kenë intensitet të lartë në të dyja këto zona, nga ana tjetër prurjet e Vjosës mund të rrisin nivelin dhe mund të krijojnë problematika të tilla”, tha Balluku.