Siguria kibernetike/ Balluku: Të bashkërendojmë veprimtaritë me BE-në

9 Korrik 2024, 14:16, Politikë CNA

Siguria kibernetike/ Balluku: Të bashkërendojmë veprimtaritë

Belinda Balluku

Zëvendëskryeministrja, njëherësh ministre e Infrastrukturës dhe Energjisë, Belinda Balluku, mori pjesë në Konferencën e nivelit të lartë për Sigurinë Kibernetike në Ballkanin Perëndimor.

Balluku theksoi se është i nevojshëm bashkërendimi i të gjithë veprimtarive midis sektorit privat, atij publik, qeverisjes dhe Bashkimit Evropian.

"Është gjithmonë kënaqësi e veçantë të mblidhemi të gjithë bashkë përfaqësuesit e vendeve të Ballkanit Perëndimor, duke qenë se tashmë është bërë traditë, tashmë lidhjet tona janë forcuar dhe tashmë ne funksionojmë si një trup i vetëm, pasi kemi kuptuar prej kohësh që duke funksionuar si të tillë jemi më të fortë dhe më të rëndësishëm. Aq më tepër kur flitet për një temë kaq delikate, siç është siguria kibernetike ndaj të cilës tashmë jemi të ndjeshëm, jo vetëm ne vendet e Ballkanit, duke ditur dhe sensibilitetet tona, por e gjithë bota, madje dhe vendet më të zhvilluara ekonomikisht. Është e rëndësishme që konferenca si kjo e sotmja të kenë vëmendjen e veçantë të qeverive dhe të ligjvënësve dhe padyshim çka është më e rëndësishme është bashkërendimi i të gjitha veprimtarive midis sektorit privat, atij publik, qeverisjes dhe padyshim Bashkimit Evropian", u shpreh Balluku.

Krijimi dhe ofrimi i shërbimeve të besueshme dhe të sigurta në mjedisin digjital ndërkufitar është një nga prioritetet qeveritare, tha Balluku ndërsa dha detaje mbi paketën "Growth Plan", Planin e Rritjes, mbi të cilën po punojnë bashkërisht vendet e Ballkanit.

"Krijimi dhe ofrimi i shërbimeve të besueshme dhe të sigurta në mjedisin digjital ndërkufitar për ne është një nga prioritetet qeveritare, prioritetet kombëtare, pasi ashtu siç kemi bërë edhe në fushën ekonomike ku e konsiderojmë Ballkanin Perëndimor si një të vetëm, ashtu duhet konsideruar edhe për sa u përket zhvillimeve digjitale dhe është kënaqësi që e gjithë kjo paketë të jetë pjesë e 'Growth Plan' për të cilin të gjitha vendet tona po punojnë në mënyrë individuale, por edhe të përbashkët. Integrimi digjital me të gjithë komponentët e tij, ku nuk mungon bashkëpunimi në fushën e sigurisë kibernetike, është një nga shtyllat kryesore të këtij plani, 'Grouth Plan', të miratuar në nëntor të vitit 2020 në Samitin e Sofjes dhe padyshim që mbetet si një nga drejtimet kryesore për planin e ri të CRM 2025-2028", u shpreh ajo.

Balluku u ndal edhe te zhvillimi digjital i vendit, ndërsa Shqipëria u sulmua kibernetikisht nga Irani. Balluku tha se në vend janë rritur kërkesat për sigurinë e infrastrukturave kritike të informacionit./CNA