web counter
LEXO PA REKLAMA!

SHKARKO APP

App Store
Google Play

"Rritje e bashkëpunimit Shqipëri-SHBA"/ Spiropali zhvillon takime në Senatin Amerikan

5 Shkurt 2026, 12:35, Politikë CNA

"Rritje e bashkëpunimit Shqipëri-SHBA"/ Spiropali zhvillon

Ministrja e Jashtme, Elisa Spiropali, ka zhvilluar disa takime në Senatin Amerikan, me fokus bashkëpunimin dhe koordinimin për çështje me interes të përbashkët mes Shqipërisë dhe SHBA-së.

Në takimin me senatoren Elissa Slotkin, u trajtua koordinimi strategjik për çështjet e sigurisë, bashkëpunimit ekonomik e politik mes dy vendeve. Në një reagim të Spiropalit në rrjete sociale, shprehet se Slotkin ka vlerësuar rolin aktiv të komunitetit të madh shqiptar në zonën e Michigan-it.

"Si përfaqësuese e Michigan-it, Senatorja Slotkin vlerëson rolin aktiv të komunitetit të madh shqiptar në zonën e saj dhe mbështet kontributin e diasporës shqiptare në fuqizimin e lidhjeve shqiptaro-amerikane", thuhet në reagim. 

Ministrja ka zhvilluar një takim edhe me Senatorin Gary Peters themelues dhe bashkëkryetar i "Albanian Issues Caucus", që ruan një vëmendje të posaçme për interesat e komunitetit shqiptaro-amerikan.

"Shqipëria e konsideron gjithashtu këtë grup miqësie, një partner të besueshëm dhe konstruktiv për avancimin e marrëdhënieve dypalëshe në të gjitha fushat me interes të përbashkët", shkruan Spiropali për takimin.

Ministrja e Jashtme u prit gjithashtu nga Senatori Steve Daines, kryetar i Nënkomisionit për Europën dhe Bashkëpunimin Rajonal të Sigurisë, mbështetës i Shqipërisë, si dhe njohës i çështjeve të sigurisë rajonale.

Në takim, Spiropali theksoi se Shqipëria mbetet e përkushtuar ndaj sigurisë transatlantike, përfshirë mbështetjen dhe angazhimin për objektivin e 5% të shpenzimeve për mbrojtjen në kuadër të NATO-s.

"Mbajtja e Samitit të NATO-s në Tiranë në vitin 2027 do të jetë një moment domethënës për forcimin e unitetit dhe kohezionit të Aleancës sonë", shprehet ministrja Spiropali në reagimin e saj. /CNA

 





Lajmet e fundit nga