Raporti i "Freedom House"/ PD: Ndërkombëtarët të vijojnë trysninë ndaj Ramës

29 Shkurt 2024, 14:56, Politikë CNA

Raporti i "Freedom House"/ PD: Ndërkombëtarët të

Floriana Garo

Zëdhënësja e Partisë Demokratike, Floriana Garo, u shpreh në një deklaratë mbi raportin vjetor të "Freedom House", se mungesa e transparencës dhe qeverisja jofunksionale vazhdojnë të përbëjnë tiparin themelor të regjimit në Shqipëri.

Në fjalën e saj ajo deklaroi se Partia Demokratike iu bën thirrje organizatave dhe partnerëve ndërkombëtarë të vazhdojnë me trysninë ndaj qeverisë Rama, i cili shpërfill një prej rekomandimeve parësore të OSBE-ODHIR dhe të partnerëve, një reformë elektorale gjithpërfshirëse.

"Kërkesa e opozitës mbetet relevante edhe në dritën e përfundimeve të raportit të "Freedom House": një qeveri teknike që siguron zgjedhje të lira dhe të pranuara nga të gjitha palët", u shpreh Garo.

Deklarata e plotë:

Në raportin e fundit të "Freedom House" Shqipëria është një vend me mungesë transparence, qeverisje jofunksionale, dhe pa zgjedhje të lira.
Këto tri fraza përshkruajnë në fakt shkurt, prerë dhe qartë, modelin e qeverisjes së 10 viteve të fundit të narkoregjimit të Edi Ramës.
Organizata “Freedom House”, me qendër në Washington, sapo ka publikuar raportin vjetor, ku Shqipëria vazhdon të konsiderohet “vend pjesërisht i lirë”, me sistem hibrid të qeverisjes.
Mungesa e transparencës dhe qeverisja jofunksionale vazhdojnë të përbëjnë tiparin themelor te regjimit në Shqipëri, sipas autores së raportit për vendin tonë, në një intervistë për "Zërin e Amerikës". Nëse transparenca duket si një term i boshatisur nga kuptimi, ajo që bie në sy në artikullin e "Freedom House" është vlerësimi i zgjedhjeve lokale të 14 majit 2023.
“Nuk është krijuar një mjedis për zgjedhje më të lira dhe më të drejta”, thekson hartuesja e raportit të "Freedom House".
Partia Demokratike e vlerëson raportin e "Freedom House" dhe sidomos përcjelljen në të të shqetësimit tonë për zgjedhjet e fundit, pasqyruar edhe në raportin final të OSBE-ODHIR.
Partia Demokratike u bën thirrje organizatave dhe partnerëve ndërkombëtarë të vazhdojnë me trysninë ndaj qeverisë Rama, i cili shpërfill një prej rekomandimeve parësore të OSBE-ODHIR dhe të partnerëve, një reformë elektorale gjithpërfshirëse.
Partia Demokratike rithekson qëndrimin e saj se, pa zgjedhje të lira dhe të ndershme nuk mund të ketë një Shqipëri funksionale. Gjithashtu me Edi Ramën në krye të qeverisë nuk mund të ketë zgjedhje të lira dhe as funksionalitet.
Kërkesa e opozitës mbetet relevante edhe në dritën e përfundimeve të raportit të "Freedom House": një qeveri teknike që siguron zgjedhje të lira dhe të pranuara nga të gjitha palët.
O sot o kurrë!/CNA