Projektligji për mbetjet/ Opozita: Qeveria po legalizon vjedhjen me inceneratorët

2 Tetor 2025, 12:58, Politikë CNA

Projektligji për mbetjet/ Opozita: Qeveria po legalizon vjedhjen me

Në Komisionin për Çështjet Ligjore janë zhvilluar debate të forta për mandatin e anëtarëve të Komisionit Rregullator të KQZ-së dhe projektligjit për menaxhimin e integruar të mbetjeve.

Deputetët e opozitës akuzuan mazhorancën se ky ligj në emër të përafrimit të ligjeve me BE-në po mbulon dhe legalizon aferën e inceneratorëve.

Deputeti demokrat, Oerd Bylykbashi, e cilësoi shumë të rëndësishëm këtë ligj dhe kërkoi që përpara se qeveria të prezantojë draftin ky dokument duhet të konsultohet me ekspertët dhe me qytetarët. Për këtë arsye ka kërkuar kohë debati dhe konsultimi dhe jo votim të shpejtë në Parlament.

Bylykbashi tha se ligji hedh uthull mbi kancerin e hapur ndaj qytetarëve dhe se çështja nuk është hetuar ende si duhet vetëm me copëza periferike.

“Një ligj kaq i rëndësishëm kërkon konsensus. Ky Kuvend duhet të fillojë të shfrytëzojë maksimumin e afatit që i lejon rregullorja, ligji duhet të ketë debat, akses dhe kontributin e ekspertëve. Dispozitat duhet të jenë harmonike me ligjet e tjera dhe Kushtetutën. Nëse hartojmë ligje me shpejtësi rrufeje, uroj ta ndryshoni këtë që në Parlament të marrin kohën edhe deputetët dhe të mos kalohet shpejt një ligj me 90 nene, jo kryetari të miratojë me pro-kundër.

Ky ligj impakton jetën e përditshme të qytetarëve sepse hedh uthull mbi kancerin e shoqërisë shqiptare.

Aty sheh korrupsionin e qeverisë dhe tentakulat e mafies. Ky ligj nuk e rregullon, por po mbulon praktikat e hapura ndaj të cilave nuk ka nisur hetimi si duhet. Çështja e inceneratorëve ende nuk është hetuar si duhet, janë kapur copëza periferike. Duhet patjetër që në Kuvend detyrë për harmonizimin e ligjit e kemi ne. Janë qindra miliona euro që po zhduken dhe njerëz që po shkojnë në burg, ju po përpiqeni t’i legalizoni.

Janë 27 vendime brenda ditës. Kemi nevojë për një strategji të re, por këtu janë fshehur interesat korruptive të qeverisë dhe ato kriminale të mafies. Nëse ka një sektor ku bëhet rregullisht bashkë mafia me qeverinë është menaxhimi i mbetjeve", tha deputeti demokrat.

Deputeti i PL-së, Blushi, teksa ministri i Mjedisit, Sofjan Jaupaj, i cili ishte prezent në komision po prezantonte projektligjin hodhi akuza në drejtim të qeverisë dhe konkretisht kryeministrit Edi Rama. Blushi iu drejtua ministrit duke i kujtuar paraardhësin e tij Lefter Koka, i cili ndodhet në burg për aferën e inceneratorëve dhe e pyeti nëse do të donte dhe ai të shkonte në burg për Ramën.

Deputeti kërkoi ndërprerjen e pagesave për inceneratorët dhe e vendosi atë si kusht për të vijuar më pas diskutimet për një ligj të ri për mbetjet.

"Edi Rama nuk mund ta kthejë Komisionin e Ligjeve në landfillin e ricklimit të ligjeve të mafies së plehrave. Edi Rama, pronari faktik i inceneratorëve, të vijë në dëgjesë publike para komisionit.

Një ministër para jush është në burg për inceneratorët, ju a jeni gati të bëni burg për Edi Ramën?

Ndërkohë që pagesat për inceneratorët fantazmë vijojnë, ju na sillni një ligj për mbetjet. Ndërprisni pagesat për inceneratorët, pranoni skandalin dhe pastaj diskutojmë ligje të tjera për mbetjet.

Strategjia që keni kaluar në 2020 fliste për 3 inceneratorë, nuk ekziston asnjë", tha Blushi.

Ndërkohë që Bylykbashi kërkoi sërish fjalën akuzoi Manjën se nuk po e lejonte.

"Më lër të mbaroj, zbato rregulloren”, i tha Bylykbashi kreut të komisionit.

“Jo nuk ke për ta mbaruar, ke një orë që flet…”, iu përgjigj deputeti i PS-së./CNA