Programi për kulturën/ Zhupa: I vetmi artist që u pasurua ishte Rama, arti në ditën më të keqe

21 Mars 2025, 17:55, Politikë CNA

Programi për kulturën/ Zhupa: I vetmi artist që u pasurua ishte

Deputetja e Partisë Demokratike, Ina Zhupa në një dalje në Syri TV ka folur për programin për kulturën. Zhupa tha se kultura është një betejë e opozitës, për të mbrojtur vlerat kulturore.

Deputetja e PD tha se Shqipëria është i vetmi vend që s’ka Teatër Kombëtar dhe e vetmja gjë që lulëzoi në qeverisjen e Ramës janë OJF-të dhe harabelët që vidhnin paratë e shqiptarëve.

I vetmi artist që u pasurua është Rama, u shpreh Zhupa. Deputetja Zhupa tha se PD do të dyfishojë buxhetin për kulturën dhe s’do lejojë koncesione në trashëgiminë kulturore.

“Me qeverisjen e Ramës kultura është kthyer në betejë të fortë të opozitës për të mbrojtur vlerat kulturore nga përçudnimi dhe trajtimi i tyre në mall tregtar për interesa klineteliste të qeverisë. U bë një eksperiment, në asnjë vend të botës, bashkimi i Ministrisë së Kulturës me atë të Ekonomisë, ku kultura u shndërrua në një aneks oligarkësh për të ndërtuar qendrat e vizitorëve, qendra tregtare për të marrë vila në zona kulturore dhe për t’u trajtuar trashëgimia kulturore si një mall tregtar.

Dëmet që i janë bërë trashëgimisë kulturore janë shumë të mëdha. Koncensioni i Butrintit, ajo e Durrësit, s’mund të behën kërkime nga arkeologët shqiptarë, por vetëm ata të ADF. Ne jemi i vetmi vend që s’kemi Teatër Kombëtar. E vetmja gjë që lulëzoi gjatë Ramës ishin OJF e harabeleve dhe zogjve të tjerë që vidhnin paratë e shqiptarëve dhe s’prodhonin as art e as kulturë. I vetmi artist që u pasurua, ishte Rama, bëri ekspozita në botë, u pasurua me libra dhe skupltura. Arti mbeti në ditën më të keqe të tij.

Me programin tonë i ndërrojmë faqen kulturës, dhe kemi ndërtuar një program që bën kulturën madhështore. Dyfishimi i buxhetit për kulturën, s’do lejojmë koncensione në trashëgiminë kulturore. Në programin e PD qartësohet statusi i veçantë i artistit. 3 shtylla themelore se si do funksionojë Ministria e Kulturës dhe artistët. Transparencë, meritokraci dhe decentralizim", tha Zhupa./ CNA