Ndryshimet në Kodin Zgjedhor për Diasporën/ Duka, thirrje emigrantëve: Regjistrohuni! Votoni!

18 Shkurt 2025, 10:32, Politikë CNA

Ndryshimet në Kodin Zgjedhor për Diasporën/ Duka, thirrje

Kreu i Partisë Agrare Ambientaliste, Agron Duka, me anë të një postimi në rrjetet sociale ka përshëndetur ndryshimet e miratuara ditën e djeshme në Kodin Zgjedhor për votën e emigrantëve.

Duka shkruan se një pikë e rëndësishme për votën e Diasporës është dhe mundësimi i votimit me dokumentet e vendeve ku jetojnë. Kreu i PAA-sëë u kë bërë edhe njëherë thirrje emigrantëve për t’u regjistruar dhe për të votuar në zgjedhjet e 11 majit.

“Përshëndesim ndryshimet në Kodin Zgjedhor për votën e emigrantëve!

Partia Agrare Ambientaliste përshëndet miratimin në parlament të ndryshimeve në Ligjin Zgjedhor, për të mundësuar votën e diasporës. Falë këmbënguljes së opozitës, u bë e mundur shtyrja e afatit të përdorimit të ID-ve dhe pasaportave Biometrike të skaduara, për të mundësuar votimin e shtetasve shqiptarë me këto dokumente edhe në këto zgjedhje.

Një pikë e rëndësishme është edhe mundësimi nga ligji i përdorimit të dokumentave biometrike të lëshuara nga vendet e tjera ku punojnë dhe jetojnë shqiptarët. Por kjo kërkon tashmë plotësimin e detajeve teknike nga ana e KQZ, për të mundësuar njohjen/përdorimin e këtyre dokumentave.

PAA ka mbrojtur vazhdimisht idenë se mundësia e votimit i duhet dhënë çdo shtetasi me të drejtë vote. Pas këtyre ndryshimeve, ne u bëjmë thirrje shqiptarëve, pavarësisht ku jetojnë e punojnë, të regjistrohen dhe të marrin pjesë masivisht në votim.

Kjo është mundësia juaj e madhe për të ndryshuar realitetin politik.

Regjistrohuni! Votoni”, shkruan Duka.

Kujtojmë që ndryshimet në Kodin Zgjedhor për votën e Diasporës u miratuan në seancën e djeshme plenare nga mazhoranca dhe opozita me 108 vota pro. Ndryshimet përfshijnë pagesën e postës për kthimin e votës së diasporës dhe numërimin. Nga këto ndryshime afati i regjistrimit për emigrantët është data 12 mars 2025./ CNA