Hetimet pasurore për çiftin Veliaj-Xoxa/ Shehaj: Të dhënat janë marrë nga ekonomistja e tyre

17 Shkurt 2025, 22:33, Politikë CNA

Ekspertja e ekonomisë, Brisida Shehaj ka ndarë sot disa informacione mbi hetimet pasurore për çiftin Veliaj-Xoxa.

Në një emision televiziv, Shehaj dha detaje në lidhje me dosjen hetimore të pasurisë për kryebashkiakun e arrestuar të Tiranës, Erion Veliaj dhe bashkëshortes së tij, Ajola Xoxa.

Sipas Shehajt, të dhënat e hetimit pasuror në dosjen e Veliajt janë marrë më së shumti nga telefoni i ekonomistes së Ajola Xoxës, Adela Kondakçiu.

Gjithashtu ekspertja e ekonomisë theksoi se ‘ato qindra mijëra euro që janë marrë nga buxheti i Bashkisë Tiranë, Erioni ka paguar veten e vetë’.

"Dosja është hetim. Për herë të parë, prokurori Ols Dado ka bërë një hetim perfekt dhe kronologjik. Ajola Xoxa ishte profesioniste, ka një NIPT-in e saj, por ka emra kompanish që kanë paguar edhe 300 mijë euro për kompaninë e Ajola Xoxës që nuk përmenden në hetim, pasi i ka të ardhura si juriste.

1.1 milionë euro lidhen, një pjesë e tyre drejtëpërdrejtë fonde të Bashkisë Tiranë me firmën e Erion Veliaj të dhëna OJF-ve të krijuara rishtazi nga daja, nusja e dajës dhe Ols Dado ka bërë një ‘ndjekje paraje’ perfekte që as Dritan Prenci për inceneratorin, as Klodian Braho nuk e ka bërë për 5D dhe as Edvin Kondili për sterilizimin.

Personi kyç i gjithë kësaj fabule quhet Adela Kondakçiu, që është ekonomistja dhe Ols Dado ka filluar me marrjen në pyetje nga këta që janë punonjësit më të ulët dhe në fund ka marrë Erion Veliajn dhe Ajola Xoxën.

Ajo dosje ka një detaj, telefoni i ekonomistes nuk është sekuestruar me urdhër të Ols Dados për dosjen e Erion Veliajt, por është sekuestruar në shtator të vitit 2023 për dosjen e Jorgo Goros sepse kjo i ka shërbyer si ekonomiste edhe Artan Gaçit.

Kur është bërë akt-ekspertimi ku në atë dosje është prokuror Ols Dado, kanë dalë gjithë qametet dhe thonë që ka edhe qamete të tjera.

Çdo lek që bën Ajola Xoxa qoftë edhe aty ku është 100% aksionere dhe paratë e marra me trashëgimi, 50% e atyre parave automatikisht janë të Erion Veliajt dhe nqs ai divorcohet.

Ato qindra mijëra euro që janë marrë nga buxheti i Bashkisë Tiranë, Erioni ka paguar veten e vetë", - tha Shehaj./CNA