Miliona lekë përfitime/ PD: Rama i dha vëllait të Armando Subashit kontratë me 1 euro

31 Maj 2024, 14:41, Politikë CNA

Zëdhënësja e Antikorrupsionit në PD, Genta Vangjeli, denoncoi këtë të premte një vendim të Këshillit të Ministrave për lidhjen e një kontrate me 1 euro.

Vangjeli deklaroi se vëllai i kryebashkiakut të PS-së, Armando Subashi, ka marrë ish-ndërmarrjen Gjeofizike për 1 euro.

Në një dalje për mediat, ajo tha se me anë të një vendimi të datës 1 tetor 2014 të Këshillit të Ministrave u lidh kontrata e qirasë ndërmjet Ministrisë së Zhvillimit Ekonomik, Tregtisë dhe Sipërmarrjes dhe një shoqërie për pasurinë ‘Ish-Ndërmarrja Gjeofizike, Patos’, pronar i së cilës rezulton Eltjon Subashi, vëllai i Armando Subashit.

Miliona lekë përfitime/ PD: Rama i dha vëllait të Armando

Vangjeli nxori edhe një video në takimin e kryeministrit Edi Rama me Diasporën në Milano, ku vëllai i Armando Subashit, deklaronte për një media se është emigrant prej gati një viti.

“Me anë të VENDIMIT Nr. 636 të 1 tetorit 2014 të Këshillit të Ministrave, Edi Rama firmosi miratimin për lidhjen e kontratës së qirasë me tarifën simbolike 1 euro/kontrata, ndërmjet Ministrisë së Zhvillimit Ekonomik, Tregtisë dhe Sipërmarrjes, si qiradhënës, dhe shoqërisë ‘Tur-Tekstil’ sh.p.k., si qiramarrës, për pasurinë ‘Ish-Ndërmarrja Gjeofizike, Patos’, me sipërfaqe të përgjithshme 12 507 m².

Po cilët janë pronarët e këtij subjekti…

Sipas të dhënave të marra nga Regjistri i Qendrës kombëtare të Biznesit, pronar rezulton Eltjon Subashi vëllai i Kryebashkiakut të Fierit Armando Subashi. Publikut, që më të drejtë nuk e njeh të vëllanë e kryebashkiakut, po ia kujtojmë më këtë video të shkurtër gjatë koncertit tallava të Edi Ramës në Milano para pak ditësh.

Miliona lekë përfitime/ PD: Rama i dha vëllait të Armando

Zyra e Punës Fier është kujdesur që të paguajë edhe subvencione për kompaninë e vëllait të kryetarit Subashi.

Sipas të dhënave të siguruara nga Spending Data Albania subjekti i kontratës 1 euro përfitoi prej Qershor 2015 deri Tetor 2017, 121 milion lekë prej Zyrës së Punës Fier.

Kështu e mbështeti qeveria Rama edhe vëllain e kryebashkiakut të Fierit Armando Subashit, i cili, afërmendsh pas këtij nderi prej milionash nuk mund të mungonte në koncertin e bosit në Milano”, deklaroi zëdhënësja e Antikorrupsionit në PD./ CNA