“Mbështetje e palëkundur për zgjerimin e BE-së”/ Ministri Hoxha pret homologët nga Austria, Çekia dhe Sllovakia

30 Prill 2026, 16:50, Politikë CNA

Ministri për Evropën dhe Punët e Jashtme, Ferit Hoxha, priti këtë të enjte tre homologët nga Austria, Çekia dhe Sllovakia.

Në një konferencë të përbashkët, katër ministrat theksuan se Ballkani Perëndimor është pjesë integrale e së ardhmes së Europës dhe në kontekstin e sotëm gjeopolitik, zgjerimi nuk është thjesht një zgjedhje politike, por një domosdoshmëri strategjike.

Po ashtu, gjatë takimit u konfirmua edhe mbështetja e këtyre vendeve në procesin e anëtarësimit europian të Shqipërisë.

“Patëm shkëmbime të hapura dhe konstruktive mbi procesin e anëtarësimit të Shqipërisë në BE dhe perspektivën më të gjerë evropiane të Ballkanit Perëndimor, në një frymë besimi, partneriteti dhe përgjegjësie të përbashkët. Ritheksova se anëtarësimi në BE mbetet prioriteti strategjik kryesor i Shqipërisë, i mbështetur fuqimisht nga një konsensus i gjerë kombëtar.

Jemi plotësisht të angazhuar për të ruajtur këtë ritëm të fortë dhe presim përmbushjen e IBAR sa më shpejt në një periudhë të afërt, duke hapur rrugën për fazën e ardhshme të negociatave, atë të mbylljes së kapitujve, për të cilën kemi punuar në mënyrë intensive dhe jemi pregatitur paralelisht.

Ky është dhe duhet të mbetet një proces i bazuar në meritë, i mbështetur në reforma dhe rezultate konkrete e të verifikueshme. Ne vijojmë të përqendrohemi në forcimin e shtetit të së drejtës, avancimin e reformës në drejtësi, luftën kundër korrupsionit, përmirësimin e qeverisjes dhe përputhjen e plotë me standardet e BE-së.

Në këtë përpjekje të përbashkët, angazhimi i vazhdueshëm dhe besimi i ndërsjelltë do të jenë thelbësore për besueshmërinë e procesit si dhe për të ecur përpara drejt një të ardhmeje të përbashkët evropiane.

Shkëmbyem gjithashtu pikëpamje mbi zhvillimet rajonale, duke theksuar rëndësinë e stabilitetit, bashkëpunimit dhe perspektives së qartë evropiane për të gjitha vendet e Ballkanit Perëndimor. U informova mbi përgatitjet për takimin e ardhshëm të Grupit “Miqtë e Ballkanit Perëndimor” në Bratislavë, dhe ramë dakord se mbështetja politike për zgjerimin, integrimi gradual dhe koordinimi më i ngushtë mes shteteve anëtare të BE-së dhe Ballkanit Perëndimor duhet të mbeten në qendër të agjendës më 12 maj dhe në vijim.

Diskutimet tona u përqendruan gjithashtu në ndërlidhjet energjitike dhe korridoret e transportit, veçanërisht në dritën e zhvillimeve aktuale gjeopolitike, përfshirë situatën në Lindjen e Mesme. Këto zhvillime nënvizojnë edhe më shumë nevojën për forcimin e lidhshmërisë rajonale, qëndrueshmërisë dhe sigurisë energjetike”,-theksoi Hoxha./CNA